SSLC Exam 2024: എസ്എസ്എൽസി പരീക്ഷ ഇന്നു മുതൽ; പരീക്ഷ എഴുതുന്നത് 4.27 ലക്ഷം വിദ്യാർത്ഥികൾ!

തിരുവനന്തപുരം: എസ്എസ്എൽസി പരീക്ഷയ്ക്ക് ഇന്ന് തുടക്കം. ഇത്തവണ  2971 കേന്ദ്രങ്ങളിലായി 4,27, 105 ലക്ഷം വിദ്യാർത്ഥികളാണ് പരീക്ഷ എഴുതുന്നത്. ടിഎച്ച്എസ്എൽസി, ആർട് എച്ച്എസ്എസ് പരീക്ഷകളും ഇന്ന് തുടങ്ങും. കേരളത്തിന് പുറമെ ലക്ഷദ്വീപിലും ഗൾഫിലുമായി 2,971 പരീക്ഷ കേന്ദ്രങ്ങളാണ് സജ്ജീകരിച്ചിട്ടുള്ളത്. പരീക്ഷയ്ക്കുള്ള എല്ലാ ഒരുക്കങ്ങളും പൂർത്തിയായതായി വിദ്യാഭ്യാസ മന്ത്രി വി ശിവൻകുട്ടി അറിയിച്ചു.

രാവിലെ 9:30 ന് പരീക്ഷ തുടങ്ങും. ആദ്യ ദിവസത്തെ പരീക്ഷ ഭാഷാ വിഷയമാണ്. ഇന്ന് കഴിഞ്ഞാൽ ഇനി ബുധനാഴ്ചയാണ് അടുത്ത പരീക്ഷ. എല്ലാ കുട്ടികളും ആത്മവിശ്വാസത്തോടെ പരീക്ഷ എഴുതണമെന്ന് വിദ്യാഭ്യാസ മന്ത്രി വി ശിവൻകുട്ടി ആശംസിച്ചിട്ടുണ്ട്. ഏറ്റവും കൂടുതൽ വിദ്യാർത്ഥികൾ പരീക്ഷ എഴുതുന്നത് മലപ്പുറം ജില്ലയിലാണ്. ഏറ്റവും കൂടുതൽ വിദ്യാർഥികൾ പരീക്ഷക്കെത്തുന്ന പികെഎംഎച്ച്എസ്‌‌എസ് ആണ് ഏറ്റവും വലിയ പരീക്ഷാ കേന്ദ്രം.  

ഇവിടെ 2085 വിദ്യാർത്ഥികളാണ് പരീക്ഷയെഴുതുന്നത്.  ഇതിനു പുറമെ ഓരോ വിദ്യാർത്ഥികൾ വീതം പരീക്ഷ എഴുതുന്ന അഞ്ച് സ്കൂളുകളും സംസ്ഥാനത്തുണ്ട്. പരീക്ഷ മാർച്ച് 25 നാണ് അവസാനിക്കുന്നത്. ഏപ്രിൽ മൂന്ന് മുതൽ 20 വരെ രണ്ട് ഘട്ടങ്ങളിലായി ഉത്തരക്കടലാസുകളുടെ മൂല്യനിർണയം നടക്കും. സംസ്ഥാനത്തൊട്ടാകെ 70 കേന്ദ്രീകൃത മൂല്യനിര്‍ണ്ണയ ക്യാമ്പുകളിലായിട്ടാണ് ഉത്തരക്കടലാസുകളുടെ മൂല്യനിര്‍ണ്ണയം നടക്കുന്നത്. 

മൂല്യ നിർണയത്തിന്റെ ആദ്യഘട്ടം ഏപ്രില്‍ 3 മുതല്‍ 12 വരെയാണ് നടക്കുക. രണ്ടാം ഘട്ടം ഏപ്രില്‍ 15 മുതല്‍ 20 വരെയും നടക്കും. മൂല്യനിര്‍ണ്ണയ ക്യാമ്പുകളിലേക്കുള്ള അഡീഷണല്‍ ചീഫ് എക്‌സാമിനര്‍മാരുടെയും, അസിസ്റ്റന്റ് എക്‌സാമിനര്‍മാരുടേയും നിയമന ഉത്തരവുകള്‍ ഈ മാസം 10 മുതല്‍ പരീക്ഷാഭവന്റെ വെബ്‌സൈറ്റില്‍ ലഭ്യമാകും. 

പരീക്ഷയ്ക്ക് പോകുന്ന വിദ്യാർത്ഥികൾ ശ്രദ്ധിക്കേണ്ട നിർദ്ദേശങ്ങൾ

പരീക്ഷയ്ക്ക് പോകുന്നതിന് മുൻപ് പരീക്ഷാ തീയതിയും സമയവും വിദ്യാർത്ഥികൾ വ്യക്തമായി ശ്രദ്ധിക്കുക. പരീക്ഷയ്ക്ക് ഒരു അരമണിക്കൂർ മുൻപെങ്കിലും കേന്ദ്രത്തിൽ എത്തിച്ചേരുക. പരീക്ഷ ഹാളിൽ പ്രവേശിക്കാൻ അഡ്മിറ്റ് കാർഡ് നിര്ബന്ധമാണ്. ഇതില്ലാതെ ആരെയും പരീക്ഷാ ഹോളിലേക്ക് കടത്തിവിടില്ല. പരീക്ഷാ ഹാളിലേക്ക് മൊബൈൽ ഫോണുകൾ, കാൽക്കുലേറ്ററുകൾ തുടങ്ങിയ ഇലക്ട്രോണിക് ഉപകരണങ്ങൾ കർശനമായി നിരോധിച്ചിട്ടുണ്ട്. 

പരീക്ഷാ സമയത്ത് ചോദ്യപേപ്പർ വായിക്കാൻ വിദ്യാർത്ഥികൾക്ക് 15 മിനിറ്റ് സമയം അനുവദിക്കാറുണ്ട്. പരീക്ഷാ സമയത്ത് കോപ്പിയടിക്കുന്നതോ മറ്റോ കണ്ടാൽ കഠിനമായ ശിക്ഷ നൽകും. പരീക്ഷാർത്ഥികൾ ഇത്തരത്തിലുള്ള മാർഗ്ഗനിർദ്ദേശങ്ങൾ പ്രത്യേകം ശ്രദ്ധിക്കുക, ഇത് പാലിക്കുക.