KIIFB Masala Bond Case: മസാല ബോണ്ട്‌ കേസ്: കിഫ്ബി ഉദ്യോഗസ്ഥർ ഇന്ന് ഇഡിക്കു മുന്നിൽ ഹാജരാകും

കൊച്ചി: മസാല ബോണ്ട്‌ കേസിൽ കിഫ്ബി ഉദ്യോഗസ്ഥർ ഇന്ന് എൻഫോഴ്സ്മെന്റ് ഡയറക്ടറേറ്റിനു മുന്നിൽ ഹാജരാകുമെന്ന് റിപ്പോർട്ട്. ഡി.ജി.എം ഫിനാൻസ് അജോഷ് കൃഷ്ണകുമാറും മാനേജർമാരുമാണ് ഇന്ന് ചോദ്യം ചെയ്യലിന് ഇഡിയുടെ കൊച്ചിയിലെ ഓഫീസിൽ എത്തുക. 

ഉദ്യോഗസ്ഥരുടെ അറസ്റ്റ് ഉൾപ്പെടെയുള്ള നടപടികളിലേക്ക് കടക്കരുതെന്ന് ഹൈക്കോടതി നേരത്തെ നിർദേശിച്ചിട്ടുണ്ട്.  സിഇഒ കെ.എം എബ്രഹാം ഇപ്പോൾ ചോദ്യംചെയ്യലിന് ഹാജരാകേണ്ട സാഹചര്യമില്ലെന്ന് കഴിഞ്ഞ ദിവസം കിഫ്ബി കോടതിയെ അറിയിച്ചിരുന്നു. ഇ.ഡിയുടെ സമൻസ് നിയമവിരുദ്ധമായതിനാൽ ഹാജരാകാൻ കഴിയില്ലെന്ന് മുൻമന്ത്രി തോമസ് ഐസക്കും കോടതിയെ അറിയിച്ചിരുന്നു. മസാല ബോണ്ട് വഴി കിഫ്‌ബി വിദേശത്തുനിന്നു സമാഹരിച്ച 2,150 കോടി രൂപ വിനിയോഗിച്ചതിൽ ഫെമ നിയമലംഘനം നടന്നിട്ടുണ്ടെന്നാണ് ഇഡി ആരോപിക്കുന്നത്.

കാട്ടാന ആക്രമണത്തിൽ ഓട്ടോറിക്ഷാ ഡ്രൈവറുടെ മരണം: മൂന്നാറിൽ ഹർത്താൽ ആരംഭിച്ചു

കാട്ടാന ആക്രമണം ഇടുക്കിയിൽ തുടരുന്ന സാഹചര്യത്തിൽ എൽഡിഎഫ് ആഹ്വാനം ചെയ്ത ഹർത്താൽ മൂന്നാറിൽ ആരംഭിച്ചു. ഇന്നലെ കാട്ടാനയുടെ ആക്രമണത്തിൽ ഔട്ടോറിക്ഷാ ഡ്രൈവറായിരുന്ന സുരേഷ് കുമാർ കൊല്ലപ്പെട്ടിരുന്നു. കെ ഡി എച്ച് വില്ലേജ് പരിധിയിലാണ് എൽഡിഎഫ് ഹർത്താലിന് ആഹ്വാനം ചെയ്തതിരിക്കുന്നത്. കോൺഗ്രസ് പ്രവർത്തകർ റോഡ് ഉപരോധിക്കുമെന്നാണ് റിപ്പോർട്ട്. മറ്റ് പ്രതിഷേധങ്ങളും ഇടുക്കിയിൽ നടക്കാൻ സാധ്യതയുണ്ട്. ഒരു മാസത്തിനുള്ളിൽ ഇടുക്കിയിൽ കാട്ടാന ആക്രമണത്തിൽ കൊല്ലപ്പെടുന്നവരുടെ എണ്ണം ഇതോടെ നാലായിരിക്കുകയാണ്.

കന്നിമല സ്വദേശി സുരേഷ് കുമാർ എന്ന മണിയെയാണ് ഇന്നലെ കാട്ടാന ക്രൂരമായി കൊന്നത്.  കാട്ടാനയുടെ ആക്രമണത്തിൽ പരിക്കേറ്റ രണ്ടുപേർ മൂന്നാറിൽ ടാറ്റാ ടീ ജനറൽ ആശുപത്രിയിൽ ചികിത്സയിലാണ്. ജോലി കഴിഞ്ഞ് ഒട്ടോയിൽ മടങ്ങുമ്പോഴായിരുന്നു സുരേഷിനെ കാട്ടാന അക്രമിച്ചത്. ഓട്ടോ മറിച്ചിട്ട ആന മണിയെ തുമ്പികൈയിൽ ചുഴുറ്റി എറിയുകയായിരുന്നുവെന്നാണ് റിപ്പോർട്ട്. ബഹളം കേട്ട് ഓടിയെത്തിയ നാട്ടുകാരാണ് ആനയെ തുരത്തിയ ശേഷം മണിയുൾപ്പടെയുള്ളവരെ ആശുപത്രിയിലെത്തിച്ചത്.  കൊല്ലപ്പെട്ട മാണിയുടെ പോസ്റ്റുമോർട്ടം നടപടികൾ ഇന്ന് നടക്കും.  

സംഭവം നടന്നത് ഇന്നലെ രാത്രി 9:30 ഓടെയായിരുന്നു. സുരേഷ് കുമാറിൻറെ ഓട്ടോയിലുണ്ടായിരുന്ന യാത്രക്കാരായ കന്നിമല സ്വദേശി എസക്കി രാജ, ഭാര്യ റെജിനാ എന്നിവർക്കാണ് പരിക്കേറ്റത്. എസക്കി രാജയുടെ മകൾ പ്രിയയുടെ സ്കൂളിൽ വാര്‍ഷിക ദിന പരിപാടി കഴിഞ്ഞു തിരികെ വരുമ്പോഴായിരുന്നു സംഭവം. രണ്ട് ഇതര സംസ്ഥാന തൊഴിലാളികളും ഇവരോടൊപ്പമുണ്ടായിരുന്നു. ഓട്ടോ ഓടിച്ചിരുന്നത് മണിയായിരുന്നു. കന്നിമല എസ്റ്റേറ്റ് ബംഗ്ലാവിനു സമീപത്തുവച്ചാണ് ഇവർ കാട്ടാനയുടെ മുന്നിലകപ്പെട്ടതെന്നാണ് വിവരം.