Kozhikode Nursing Student Death: കോഴിക്കോട് നഴ്സിങ് വിദ്യാർഥിനിയുടെ മരണം; അസ്വാഭാവിക മരണത്തിന് കേസ്, രക്ഷിതാക്കളുടെയും ഒപ്പം താമസിച്ചിരുന്നവരുടെയും മൊഴിയെടുക്കും

കോഴിക്കോട്: നഴ്സിങ് വിദ്യാർത്ഥി ലക്ഷ്മി രാധാകൃഷ്ണന്റെ മരണത്തിൽ രക്ഷിതാക്കളുടെയും ഒപ്പം താമസിച്ചിരുന്ന വിദ്യാർത്ഥികളുടെയും മൊഴിയെടുക്കും. വ്യക്തിപരമായ കാരണങ്ങളാകാം ആത്മഹത്യയിലേക്ക് നയിച്ചതെന്നാണ് പ്രാഥമിക നിഗമനം. സംഭവത്തിൽ മെഡിക്കൽ കോളജ് പൊലീസ് അസ്വാഭാവിക മരണത്തിന് കേസെടുത്തിട്ടുണ്ട്. ഇന്നലെ ലക്ഷ്മി ക്ലാസിൽ പോയിരുന്നില്ല. അസുഖമായതിനാൽ ലീവ് എടുക്കുന്നുവെന്ന് ലക്ഷ്മി അറിയിച്ചിരുന്നു. ഹോസ്റ്റൽ മുറി വൃത്തിയാക്കാൻ പതിനൊന്നരയോടെ ആളുകൾ വന്നപ്പോഴാണ് ലക്ഷ്മിയെ തൂങ്ങിമരിച്ച നിലയിൽ കണ്ടെത്തിയത്. മുറിയിലെ ഫാനിൽ ഷാൾകെട്ടി തൂങ്ങിയ നിലയിലായിരുന്നു. 

ഇന്നലെ രാത്രി വൈകിയാണ് ലക്ഷ്മിയുടെ ബന്ധുക്കൾ സ്ഥലത്തെതതിയത്. പോസ്റ്റ്മോർട്ടം ഇന്ന് നടക്കും. കോട്ടയം കിടങ്ങൂർ സ്വദേശിയായ ലക്ഷ്മി കോഴിക്കോട് സർക്കാർ നഴ്സിങ് കോളേജിലെ രണ്ടാം വർഷ വിദ്യാർത്ഥിനിയാണ്. ഇന്നലെ ഉച്ചയ്ക്ക് 12 മണിയോടെയാണ് ലക്ഷ്മിയെ ഹോസ്റ്റൽ മുറിയിൽ തൂങ്ങി മരിച്ച നിലയിൽ കണ്ടെത്തിയത്. മെഡിക്കൽ കോളേജിന് പിറക് വശത്തെ കെ എം കൃഷ്ണൻകുട്ടി റോഡിലെ ബക്കർ വില്ല എന്ന ഹോസ്റ്റലിലാണ് ലക്ഷ്മി താമസിച്ചിരുന്നത്.