Wadakkanchery Accident: KSRTC സ്വിഫ്റ്റും ഗുഡ്‌സ് ഓട്ടോറിക്ഷയും കൂട്ടിയിടിച്ച് നാലുവയസുകാരിക്ക് ദാരുണാന്ത്യം

വടക്കാഞ്ചേരി: തൃശൂര്‍ ഓട്ടുപാറയില്‍ വടക്കാഞ്ചേരിക്കടുത്ത്  കെഎസ്ആര്‍ടിസി സ്വിഫ്റ്റ് ബസ് പെട്ടി ഓട്ടോറിക്ഷയിലിടിച്ച് നാലു വയസ്സുകാരിക്ക് ദാരുണാന്ത്യം. മുള്ളൂര്‍ക്കര സ്വദേശി നൂറാ ഫാത്തിമയാണ് മരിച്ചത്. ഗര്‍ഭിണിയായ യുവതിക്കും പരിക്കേറ്റിട്ടുണ്ട്. 

ആശുപത്രിയിലേക്ക് കൊണ്ടുപോകും വഴിയാണ് കുട്ടി മരിച്ചത്.  അപകടത്തിൽ പരിക്കേറ്റ മുള്ളൂർക്കര സ്വദേശി ഉനൈസ്, ഭാര്യ റെയ്ഹാനത്ത് എന്നിവരെ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിട്ടുണ്ട്.  ഇവർ നൂറ ഫാത്തിമയുടെ മാതാപിതാക്കളാണ്.

വയറു വേദന മൂലം നൂറ ഫാത്തിമയെ ഗുഡ്‌സ് ഓട്ടോറിക്ഷയിൽ ആശുപത്രിയിൽ കൊണ്ടു പോകുന്നതിനിടെയാണ് അപകടം നടന്നത്.

തിരൂർ പുതിയങ്ങാടിയിൽ ആന ഇടഞ്ഞു; ഒരാളെ തൂക്കിയെറിഞ്ഞു!

മലപ്പുറം: തിരൂർ പുതിയങ്ങാടിയിൽ നേർച്ചയ്ക്കിടെ ആന ഇടഞ്ഞ് നിരവധി പേർക്ക് പരിക്കേറ്റതായി റിപ്പോർട്ട്. പാക്കത്ത് ശ്രീക്കുട്ടൻ എന്ന ആനയാണ് ഇടഞ്ഞത്. മദമിളകിയ ആന ഒരാളെ തൂക്കിയെറിഞ്ഞു. ആൾക്ക് ഗുരുതരമായി പരിക്കേറ്റിട്ടും. ഇയാൾ ​ആശുപത്രിയിൽ ചികിത്സയിലാണ്. 17 പേർക്ക് പരിക്കേറ്റിട്ടുണ്ട്.

നേർച്ചയുടെ സമാപനചടങ്ങിനിടെ രാത്രി 12.30 നായിരുന്നു സംഭവം നടന്നത്.  ആന ഇടഞ്ഞതിനെ തുടർന്നുണ്ടായ തിക്കിലും തിരക്കിലും പെട്ടാണ് നിരവധി പേര്‍ക്ക് പരിക്കേറ്റത്. ഒടുവിൽ പാപ്പാൻ ഇടപെട്ട് ആനയെ തളച്ചതോടെ വൻ അപകടം ഒഴിവായി. പരിക്കേറ്റവരെ സമീപത്തെ ആശുപത്രികളില്‍ പ്രവേശിപ്പിച്ചിട്ടുണ്ട്. പുലർച്ചെ 2.15 ഓടെയാണ് പാപ്പാൻ ആനയെ തളച്ചത്.