Kerala Rain Alert: സംസ്ഥാനത്ത് മഴയ്ക്ക് ശമനം: 4 ദിവസത്തേക്ക് മുന്നറിയിപ്പില്ല

തിരുവനന്തപുരം: സംസ്ഥാനത്ത് വരും ദിവസങ്ങളിൽ മഴയ്ക്ക് ശമനമെന്ന് കേന്ദ്ര കാലാവസ്ഥാ വകുപ്പിന്റെ അറിയിപ്പ്. അടുത്ത നാല് ദിവസത്തേയ്ക്ക് ഒരു ജില്ലയിലും പ്രത്യേക മഴ മുന്നറിയിപ്പുകളില്ല. 

ശബരിമലയിലും ഇന്ന് പ്രത്യേക മഴ മുന്നറിയിപ്പുകൾ നൽകിയിട്ടില്ല. ആകാശം ഭാഗികമായി മേഘാവൃതമായതിനാൽ നേരിയ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് അറിയിച്ചിട്ടുണ്ട്.  മാത്രമല്ല സംസ്ഥാനത്തിൻ്റെ പലയിടങ്ങളിലും തണുപ്പ് അനുഭവപ്പെട്ടതായും റിപ്പോർട്ടുണ്ട്. മൂന്നാർ ചെണ്ടുവേര എസ്റ്റേറ്റിൽ താപനില മൈനസ് 1 ഡിഗ്രിയായി കുറഞ്ഞിട്ടുണ്ട്. കുണ്ടല ഡാമിൽ 2.5 ഡിഗ്രീ, വട്ടവടയിൽ 8.3 ഡിഗ്രീ എന്നിങ്ങനെയാണ് താപനില. ശബരിമലയിലും സീസണിലെ ഏറ്റവും കുറഞ്ഞ താപനില ഇന്നലെ രേഖപ്പെടുത്തിയിരുന്നു.

ഈ സീസണിലെ ഏറ്റവും കുറഞ്ഞ താപനിലയാണ് മൂന്നാർ, കന്നിമല, അരുവിക്കാട്, ചെണ്ടുവര, കുണ്ടള, മാട്ടുപ്പെട്ടി, ലക്ഷ്മി, സെവൻവല എന്നിവിടങ്ങളിൽ തണുപ്പ് കൂടുതലായി അനുഭവപ്പെട്ടതായും റിപ്പോർട്ടുണ്ട്. ക്രിസ്മസ് അവധി പ്രമാണിച്ച് മൂന്നാർ സന്ദർശിക്കാൻ എത്തിയ സഞ്ചാരികളെ മഞ്ഞു കാഴ്ചകൾ ഹരം കൊള്ളിച്ചു. 

മഴമുന്നറിയിപ്പില്ലാത്തതിനെ തുടർന്ന് ഇന്ന് കേരളം കർണാടക ലക്ഷദീപ് തീരങ്ങളിൽ മത്സ്യബന്ധനത്തിനു തടസമില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചിട്ടുണ്ട്. എന്നാൽ വടക്കൻ തമിഴ്‌നാട് തീരം, മധ്യ പടിഞ്ഞാറൻ ബംഗാൾ ഉൾക്കടൽ  അതിനോട് ചേർന്ന തെക്കു പടിഞ്ഞാറൻ ബംഗാൾ ഉൾക്കടൽ, തെക്കൻ ആന്ധ്രപ്രദേശ് തീരം എന്നിവിടങ്ങളിൽ മണിക്കൂറിൽ 35  മുതൽ 45  കിലോമീറ്റർ വരെയും ചില അവസരങ്ങളിൽ മണിക്കൂറിൽ 55 കിലോമീറ്റർ വരെയും വേഗതയിൽ ശക്തമായ കാറ്റിന് സാധ്യതയുള്ളതിനാൽ ഇവിടങ്ങളിൽ മത്സ്യബന്ധനത്തിന് വിലക്കുണ്ട്.