Lok Sabha Election 2024 : ഇടുക്കിയിൽ മുൻ കോൺഗ്രസ് എംഎൽഎ പാർട്ടി വിട്ടു സിപിഎമ്മിനോടൊപ്പം ചേർന്നു

മുൻ എംഎൽഎയും കെപിസിസി എക്സിക്യൂട്ടീവ് അംഗവുമായിരുന്ന പി പി സുലൈമാൻ റാവുത്തർ കോൺഗ്രസ് വിട്ട് സിപിഎമ്മിനോടൊപ്പം ചേർന്നു. രമേശ് ചെന്നിത്തല ചെയർമാനായുള്ള 25 അംഗ തെരഞ്ഞെടുപ്പ് പ്രചാരണസമിതി അംഗത്വം രാജിവച്ചാണ് റാവുത്തർ സിപിഎമ്മിലേക്ക് എത്തിയത്. ഇന്ന് ഏപ്രിൽ പത്തിന് ഉച്ചയോടെയാണ് സിപിഐഎം ഇടുക്കി ജില്ലാ സെക്രട്ടറി സി വി വർഗീസിനൊപ്പം സുലൈമാൻ റാവുത്തർ തൊടുപുഴയിൽ എത്തി വാർത്താസമ്മേളനം നടത്തി കോൺഗ്രസ് വിട്ടതായി പ്രഖ്യാപിച്ചത്. 

കോൺഗ്രസ് നേതാക്കളിൽ നിന്നും അപമാനവും അവഗണനയും ഉണ്ടായി. തിരഞ്ഞെടുപ്പ് പ്രചരണ തൊഴിലാളിയായി തന്നെ കണ്ടു. രമേശ് ചെന്നിത്തലയും, കെ സുധാകരനും തന്നെ അപമാനിച്ചതായും സുലൈമാൻ റാവുത്തർ പറഞ്ഞു.

കോൺഗ്രസ് നേതൃത്വത്തിനെതിരെ വലിയ രീതിയിൽ അതൃപ്തി പ്രമുഖ നേതാക്കൾക്കുണ്ടെന്നും മുൻ എം എൽ എ പറഞ്ഞു. കെഎസ്‌യു പ്രവർത്തകനായി കോൺഗ്രസ് രാഷ്ട്രീയത്തിലേക്ക് കടന്നുവന്ന പി പി സുലൈമാൻ റാവുത്തർ ഇടുക്കിയിൽ നിന്നുമാണ് രണ്ട് തവണയും മത്സരിച്ചത്. ഇടുക്കിയിൽ പ്രവർത്തന പരിചയമുള്ള സുലൈമാൻ റാവുത്തരുടെ കടന്നുവരവ് എൽഡിഎഫ് സ്ഥാനാർത്ഥി അഡ്വക്കേറ്റ് ജോയ്സ് ജോർജിന് അനുകൂല സാഹചര്യം ഒരുക്കും എന്നാണ് ഇടതു നേതാക്കളുടെ വിലയിരുത്തൽ.