Hanged to death: യുവാവ് തൂങ്ങി മരിച്ച നിലയിൽ; ദുരൂഹതയെന്ന് ബന്ധുക്കൾ

തിരുവനന്തപുരം: കാട്ടാക്കട കട്ടക്കോട് ബഥനിപുരത്ത് യുവാവ് തൂങ്ങിമരിച്ച നിലയിൽ. ബഥനിപുരം സ്വദേശി പ്രശാന്താണ് മരിച്ചത്. പ്രശാന്തിന്റെ ഭാര്യ ജിൻസി കഴിഞ്ഞദിവസം പ്രശാന്തിൻ്റെ വീട്ടിലേക്ക് വിളിച്ച് പിതാവിനോട് അസഭ്യം പറയുന്ന വീഡിയോ പുറത്തുവന്നു. ഇതോടെ സംഭവത്തിൽ ദുരൂഹത ആരോപിച്ച് യുവാവിന്റെ ബന്ധുക്കൾ രം​ഗത്തെത്തി. വിശദമായ അന്വേഷണം നടത്തണമെന്ന് ബന്ധുക്കൾ ആവശ്യപ്പെട്ടു.

ഇന്ന് രാവിലെയാണ് പ്രശാന്തിൻ്റെ മരണവിവരം അച്ഛൻ പരമേശ്വരൻ ആചാരിയും അമ്മ സുജാതയും അറിയുന്നത്. മരപ്പണിക്കാരനായ പ്രശാന്ത് ഇന്ന് രാവിലെ മൂന്നാറിൽ ജോലിക്ക് പോകുമെന്ന് പറഞ്ഞ് ഇന്നലെ രാത്രി കുടുംബവീട്ടിൽ നിന്ന് എട്ട് മണിയോടെ ഭാര്യ വീട്ടിൽ പോയതാണ്. പിന്നീട് രാത്രി ഒമ്പത് മണിയോടെ പ്രശാന്തിന്റെ ഭാര്യ ജിൻസി ഭർത്താവിൻ്റെ പിതാവിനെ ഫോണിൽ വിളിച്ച് അസഭ്യം വിളിച്ചിരുന്നു.

പിതാവിനെ അസഭ്യം പറയുന്ന ദൃശ്യം പ്രശാന്ത് ഫോണിൽ ചിത്രീകരിച്ചു. തുടർന്ന് ബന്ധുക്കൾക്ക് അയച്ചുകൊടുത്തു. ഭാര്യ എന്നെ കൊല്ലാൻ നിൽക്കുന്നുവെന്ന് പറഞ്ഞതായും ബന്ധുക്കൾ പറഞ്ഞു. ജിൻസിയും പ്രശാന്തും മിശ്രവിവാഹിതരാണ്. ഇരുവരുടെ പ്രണയ വിവാഹം ആണ്. ജിൻസിക്ക് പോലീസിൽ ജോലി ശരിയായതായും ഇതിന് ശേഷം പ്രശാന്തിനെ ഒഴിവാക്കാൻ ശ്രമം നടന്നിരുന്നുവെന്നും ബന്ധുക്കൾ പറഞ്ഞു.

പോലീസിൻ്റെ ഇൻ്റർവ്യൂമായി ബന്ധപ്പെട്ട് പെരുംകുളം വില്ലേജിൽ നിന്ന് ഹിന്ദു സർട്ടിഫിക്കറ്റ് ആവശ്യപ്പെട് ജിൻസിയും കോൺഗ്രസിൽ നിന്നും പുറത്താക്കിയ ഒരു നേതാവും വില്ലേജ് ഓഫീസിൽ എത്തി പ്രശ്‌നമുണ്ടാക്കിയിരുന്നു. തുടർന്ന് ഇവരുടെ പരാതിയിൽ വില്ലേജ് ഓഫീസറെ സ്ഥലം മാറ്റിയെന്നാണ് പ്രശാന്തിൻ്റെ ബന്ധുക്കൾ പറയുന്നത്.