Media One Telecast | മീഡിയ വൺ സംപ്രേഷണം വീണ്ടും തടഞ്ഞ് കേന്ദ്രം; സുരക്ഷാ പ്രശ്നങ്ങളെന്ന് വിവരം

കോഴിക്കോട് : മലയാളം വാർത്ത ചാനലായ മീഡിയ വണ്ണിന്റെ (Media One) സംപ്രേഷണം കേന്ദ്ര വാർത്ത വിതരണ മന്ത്രാലയം വീണ്ടും തടഞ്ഞു. സുരക്ഷ കാരണങ്ങൾ ഉന്നയിച്ചാണ് കേന്ദ്രം മീഡിയ വണ്ണിന്റെ സംപ്രേഷണം തടഞ്ഞിരിക്കുന്നത്. അതേസമയം ഉത്തരവിനെതിരെ മീഡിയ വൺ നിയമനടപടികൾക്ക് ഒരുങ്ങുകയാണെന്ന് ചാനൽ അറിയിച്ചു.

"സംപ്രേഷണം തടഞ്ഞതിന്റെ വിശദാംശങ്ങൾ നൽകാൻ കേന്ദ്ര സർക്കാർ തയ്യറായിട്ടില്ല. ഉത്തരവിനെതിരെ മീഡിയവൺ നിയമനടപടികൾ ആരംഭിച്ചിട്ടുണ്ട്" മീഡിയവൺ എഡിറ്റർ പ്രമോദ് രാമൻ ചാനലിന്റെ സംപ്രേഷണം താൽക്കാലികമായി അവസാനിപ്പിച്ചുകൊണ്ട് പറഞ്ഞു. 

നേരത്തെ 2020 മാർച്ചിൽ ഡൽഹി കലാപ സമയത്ത് കേന്ദ്രം മലയാളത്തിലെ രണ്ട് വാർത്ത സംപ്രേഷണ ചാനലുകൾക്ക് വിലക്കേർപ്പെടുത്തിയിരുന്നു. അതിൽ ഒന്ന് മീഡിയ വൺ ആയിരുന്നു. 48 മണിക്കൂർ നേരത്തേക്കായിരുന്നു ചാനലിന്റെ സംപ്രേഷണം അന്ന് കേന്ദ്രം തടഞ്ഞത്.

2013 ഫെബ്രുവരിയിലാണ് മീഡിയ വൺ ചാനൽ കേരളത്തിൽ സംപ്രേഷണം ആരംഭിക്കുന്നത്. കോഴിക്കോട് ആസ്ഥാനമായി ജമാആത്ത്-ഇ-ഇസ്ലാമി സംഘടനയുടെ നേതൃത്വത്തിലുള്ള മാധ്യമം ബ്രോഡ്കാസ്റ്റിങ് ലിമിറ്റഡിന്റെ കീഴിലാണ് മീഡിയ വൺ പ്രവർത്തിക്കുന്നത്. സീനിയർ ജേർണലിസ്റ്റ് പ്രമോദ് രാമനാണ് ചാനലിന്റെ എഡിറ്റർ.