Wild Elephant: ബേലൂർ മഗ്നയെ പിടികൂടാനുള്ള ദൗത്യം 14 ദിവസം പിന്നിട്ടു, തിരച്ചിൽ തുടരുന്നു; പ്രതിഷേധം ശക്തം

വയനാട്: മാനന്തവാടിയിൽ ഇറങ്ങിയ ബേലൂർ മ​ഗ്നയെന്ന മോഴയാനയെ പിടികൂടാനുള്ള ദൗത്യം തുടരുന്നു. പടമലയിൽ അജീഷിനെ കൊലപ്പെടുത്തി രണ്ടാഴ്ച കഴിഞ്ഞിട്ടും ആനയെ പിടികൂടാൻ കഴിയാത്തതിൽ പ്രതിഷേധം ശക്തമാണ്. അതേസമയം കർണാടക ഉൾവനത്തിൽ തുടരുന്ന കാട്ടാന കർണാടക-കേരള വനംവകുപ്പിന്റെ നിരീക്ഷണത്തിലാണ്.

ബേലൂർ മഗ്നയെ പിടികൂടാനുള്ള ദൗത്യം 14 ദിവസം കഴിഞ്ഞിട്ടും ഫലം കാണാത്തതിൽ പ്രതിഷേധത്തിലാണ് പ്രദേശവാസികൾ. കേരള അതിര്‍ത്തിയില്‍ നിന്നും ഏകദേശം അഞ്ച് കിലോമീറ്റര്‍ ദൂരെയായി കര്‍ണാടക ഉള്‍വനത്തിലാണ് അവസാനമായി സി​ഗ്നലുകൾ ലഭിച്ചത്. ആന തിരിച്ച് കേരളവനമേഖലയില്‍ എത്തിയാല്‍ മാത്രമേ മയക്കുവെടിവെക്കാനാകൂവെന്നതാണ് ദൗത്യസംഘം നേരിടുന്ന പ്രധാന വെല്ലുവിളി.

കര്‍ണാടക വനം വകുപ്പും ബേലൂര്‍ മ​ഗ്നയുടെ നീക്കം നിരീക്ഷിച്ചുവരികയാണ്. മുള്ള് പടര്‍ന്ന അടിക്കാടാണ് ആനയെ പിടികൂടാനുള്ള ദൗത്യത്തെ പ്രതികൂലമായി ബാധിക്കുന്നത്. ആന ഒരിടത്തും നില്‍ക്കാതെ സഞ്ചരിക്കുന്നതും വെല്ലുവിളിയാണ്. കേരളത്തിലെ ജനവാസ മേഖലയിലേക്ക് ആന ഇറങ്ങാതിരിക്കുന്നതിന് ഓണ്‍ലൈന്‍ സി​ഗ്നൽ വഴി കേരള വനംവകുപ്പ് നിരീക്ഷണം തുടരുന്നുണ്ട്.

കൂടാതെ രാത്രികാല പട്രോളിംഗ് തുടരുകയാണ്. മയക്കുവെടി വിദഗ്ധരായ നവാബ് അലിഖാനും അരുൺ സക്കറിയയും ദൗത്യത്തിൽ ചേർന്നിട്ടുണ്ട്. ഈ വർഷം മാത്രം മൂന്ന് പേരാണ് വന്യജീവി ആക്രമണങ്ങളിൽ വയനാട്ടിൽ മരിച്ചത്. ആനയുടെ ആക്രമണം ഉണ്ടായ പ്രദേശത്ത് കടുവയുടെ സാന്നിധ്യം ഉണ്ടായതു പ്രദേശവാസികളിൽ ഭീതിപടർത്തുന്നു.