Palakkad By Election 2024: കലാശക്കൊട്ടിനൊരുങ്ങി മുന്നണികൾ; പാലക്കാട് ഇന്ന് പരസ്യപ്രചാരണം അവസാനിക്കും

പാലക്കാട്: നവംബർ 20ന് ഉപതെരഞ്ഞെടുപ്പ് നടക്കാനിരിക്കുന്ന പാലക്കാട് ഇന്ന് കൊട്ടിക്കലാശം. പരസ്യ പ്രചാരണം അവസാനിക്കുന്ന ഇന്ന് മുന്നണികൾ റോഡ്ഷോകൾ നടത്തും. വൈകിട്ട് 6 മണി വരെയാണ് പരസ്യ പ്രചാരണം നടത്താനുള്ള സമയം. 27 ദിവസം നീണ്ടുനിന്ന പ്രചാരണമാണ് ഇന്ന് അവസാനിക്കുന്നത്. യുഡിഎഫിന്റെ രാഹുൽ മാങ്കൂട്ടത്തിൽ എൽഡിഎഫ് സ്വതന്ത്രൻ ഡോ പി സരിൻ, എൻഡിഎയുടെ സി കൃഷ്ണകുമാറും തമ്മിലാണ് മത്സരം. എല്ലാവരും മാതൃകാപെരുമാറ്റച്ചട്ടം കര്‍ശനമായി പാലിക്കണമെന്ന് ജില്ലാ തെരഞ്ഞെടുപ്പ് ഉദ്യോഗസ്ഥ ജില്ലാ കളക്ടര്‍ ഡോ. എസ് ചിത്ര പറഞ്ഞു.

യുഡിഎഫ് സ്ഥാനാർത്ഥി രാഹുൽ മാങ്കൂട്ടത്തിലിന്റെ റോഡ് ഷോ ഉച്ചയ്ക്ക് 2 മണിക്ക് ഒലവക്കോട് നിന്നാണ് തുടങ്ങുന്നത്. ബിജെപി സ്ഥാനാർത്ഥി സി.കൃഷ്ണകുമാറിന്റെ റോഡ് ഷോ മേലാമുറി ജങ്ഷനിൽ നിന്നും തുടങ്ങും. പി സരിൻ രാവിലെ കണ്ണാടി, പകൽ 11ന്‌ മാത്തൂർ, രണ്ടിന്‌ പിരായിരി എന്നീ പഞ്ചായത്തുകളിൽ മെഗാറോഡ്‌ ഷോ നടത്തുമെന്നാണ് വിവരം. വൈകിട്ട്‌ നാലിന്‌ ഇൻഡോർ സ്‌റ്റേഡിയം പരിസരത്തുനിന്ന്‌ കൊട്ടിക്കലാശത്തിന്‌ തുടക്കം കുറിക്കും. ശേഷം തുറന്ന ജീപ്പിൽ സ്ഥാനാർഥി പ്രകടനം നടത്തും. അവസാനം പ്രകടനം സുൽത്താൻപേട്ട വഴി സ്‌റ്റേഡിയം സ്‌റ്റാൻഡിൽ സമാപിക്കും.