K Surendran: പാലക്കാട് തിരഞ്ഞെടുപ്പിലെ തോൽവി; കെ. സുരേന്ദ്രൻ രാജി വയ്ക്കും?

ബിജെപി സംസ്ഥാന അധ്യക്ഷ സ്ഥാനം രാജിവയ്ക്കാൻ തയ്യാറെന്ന് കെ. സുരേന്ദ്രൻ. സ്ഥാനത്ത് നിന്ന് ഒഴിയാൻ തയ്യാറെന്ന് കേന്ദ്ര നേതൃത്വത്തെ അറിയിച്ചു. ജെ പി നഡ്ഡ, ബി എൽ സന്തോഷ് എന്നിവരെയാണ് രാജി സന്നദ്ധത അറിയിച്ചത്.  പാലക്കാട് ഉപതിരഞ്ഞെടുപ്പിലെ തോൽവിയുടെ പശ്ചാതലത്തിലാണ് തീരുമാനം. 

നിലവിൽ രാജി വേണ്ടെന്ന് കേന്ദ്ര നേതൃത്വം അറിയിച്ചതായി സുരേന്ദ്രൻ പക്ഷം അവകാശപ്പെടുന്നു. കെ സുരേന്ദ്രൻ സംസ്ഥാന പ്രസിഡന്റ് സ്ഥാനത്ത് തുടരാൻ കേന്ദ്രം നി‍ർദേശിച്ചതായും സൂചന.

അതേസമയം ശോഭ സുരേന്ദ്രനെതിരെ ഗുരുതരമായ ആരോപണങ്ങളും കെ.സുരേന്ദ്രൻ കേന്ദ്ര നേതൃത്വത്തെ അറിയിച്ചു.  പാലക്കാട് തിരഞ്ഞെടുപ്പ് അട്ടിമറിച്ചത് ശോഭാ സുരേന്ദ്രനും ശോഭയെ അനുകൂലിക്കുന്ന 18 നഗരസഭ കൗൺസിലർമാരും ചേർന്നാണെന്ന് കേന്ദ്രത്തിന് പരാതി നൽകി. 

ശോഭാ സുരേന്ദ്രന്റെ ഡ്രൈവറുടെ നേതൃത്വത്തിൽ കണ്ണാടി മേഖലയിൽ വോട്ട് മറിച്ചു. കച്ചവടക്കാർക്കുള്ള യൂസർ ഫീ 300 രൂപയിൽ നിന്ന് 100 ആയി കുറക്കണം എന്ന നിർദ്ദേശം നഗരസഭ അധ്യക്ഷ തള്ളി. സ്മിതേഷ് മീനാക്ഷി, ദിവ്യ, സാബു തുടങ്ങിയ നഗരസഭ കൗൺസിലർമാർ സ്ഥാനാർത്ഥിക്കെതിരെ പ്രവർത്തിച്ചതായും സുരേന്ദ്രൻ കേന്ദ്ര നേതൃത്വത്തെ അറിയിച്ചു. സഹപ്രഭാരിയുടെ നേതൃത്വത്തിൽ അന്വേഷണം വേണമെന്നും സുരേന്ദ്രൻ കേന്ദ്രത്തോട് ആവശ്യപ്പെട്ടു.