Wayanad landslide: പ്രധാനമന്ത്രി നരേന്ദ്ര മോദി വയനാട്ടിലേക്ക്; ദുരന്തമേഖല സന്ദർശിക്കും

വയനാട്: പ്രധാനമന്ത്രി നരേന്ദ്ര മോദി ഉരുൾപൊട്ടൽ നടന്ന വയനാട് ദുരന്ത മേഖല സന്ദർശിക്കും. ശനിയാഴ്ചയാണ് പ്രധാനമന്ത്രി വയനാട്ടിലെത്തുക. കണ്ണൂർ വിമാനത്താവളത്തിൽ ഇറങ്ങിയ ശേഷം ഹെലികോപ്ടർ മാർ​ഗം ആയിരിക്കും പ്രധാനമന്ത്രി വയനാട്ടിലേക്ക് എത്തുക. ദുരന്ത ബാധിത മേഖലയും ക്യാമ്പും പ്രധാനമന്ത്രി സന്ദർശിക്കുമെന്നാണ് വിവരം.

ഡൽഹിയിൽ നിന്ന് പ്രത്യേക വിമാനത്തിലായിരിക്കും നരേന്ദ്ര മോദി കണ്ണൂർ വിമാനത്താവളത്തിൽ എത്തുക. ദുരന്തബാധിത പ്രദേശങ്ങൾ ഹെലികോപ്ടറിൽ സന്ദർശിക്കും. അതിന് ശേഷം ദുരിതബാധിതർ താമസിക്കുന്ന ക്യാമ്പുകളും സന്ദർശിക്കുമെന്നാണ് വിവരം. വയനാട്ടിലെ പുനരധിവാസവുമായി ബന്ധപ്പെട്ട ആവശ്യങ്ങളെ സംബന്ധിച്ച് സംസ്ഥാന സർക്കാർ കേന്ദ്രസർക്കാരിനോട് ആവശ്യങ്ങൾ ഉന്നയിച്ചിട്ടുണ്ട്.

അതേസമയം, ഉരുൾപൊട്ടലിൽ കാണാതായവർക്ക് വേണ്ടിയുള്ള തെരച്ചിൽ തുടരുകയാണ്. വിവിധ വകുപ്പുകളുടെ മേധാവിമാർ ചേർന്നാണ് ഇന്ന് ദുരന്തമേഖലയിൽ പരിശോധന നടത്തിയത്. നേരത്തെ പരിശോധിച്ച സ്ഥലങ്ങളിൽ വീണ്ടും വിശദമായി പരിശോധന നടത്തും. സൺറൈസ് വാലിയിലും പ്രത്യേക സംഘം പരിശോധന തുടരും.

തിരിച്ചറിയാത്ത 44 മൃതദേഹങ്ങളും 176 ശരീരഭാഗങ്ങളുമാണ് ഇതുവരെ സംസ്കരിച്ചത്. ദുരന്തത്തിൽപ്പെട്ട 152 പേരെ ഇനിയും കണ്ടെത്താനുണ്ട്.  കാണാതായവരുടെ പേരും വിലാസവും ഫോട്ടോയും ഉൾപ്പടെ കരട് പട്ടിക പ്രസിദ്ധീകരിച്ചിട്ടുണ്ട്. കാണാതായവരുടെ ബന്ധുക്കൾ ഡിഎൻഎ പരിശോധനയ്ക്കായി രക്തസാമ്പിളുകൾ നൽകാൻ തയ്യാറാകണമെന്ന് മന്ത്രി കെ രാജൻ അറിയിച്ചു.