Suresh Gopi: ആംബുലൻസ് ദുരുപയോഗം ചെയ്തെന്ന് പരാതി; സുരേഷ് ഗോപിക്കെതിരെ അന്വേഷണം തുടങ്ങി പൊലീസ്

ആംബുലൻസ് ദുരുപയോ​ഗം ചെയ്തെന്ന പരാതിയിൽ കേന്ദ്ര മന്ത്രി സുരേഷ് ​ഗോപിക്കെതിരെ അന്വേഷണം. തൃശ്ശൂർ സിറ്റി പൊലീസാണ് അന്വേഷണം ആരംഭിച്ചത്.  സിപിഐ തൃശ്ശൂർ മണ്ഡലം സെക്രട്ടറി അഡ്വക്കേറ്റ് സുമേഷ് നൽകിയ പരാതിയിലാണ് അന്വേഷണം. ത‍ൃശ്ശൂർ എസ്പി സുമേഷിന്റെ മൊഴി രേഖപ്പെടുത്തി.

മോട്ടോർ വാഹനവകുപ്പിന്റെ അന്വേഷണവും സുരേഷ് ​ഗോപിക്കെതിരെ നടക്കുന്നുണ്ട്. ​ഗതാ​ഗത കമ്മീഷണർ തൃശ്ശൂർ ആർടിഓ എൻഫോഴ്സ്മെന്റ് ഓഫീസറോട് അന്വേഷണ റിപ്പോർട്ട് നൽകാൻ ആവശ്യപ്പെട്ടു. 

ചടങ്ങുകൾ അലങ്കോലമായതിന്റെ പേരിൽ തിരുവമ്പാടി വിഭാ​ഗം പൂരം നിർത്തിവച്ചതിന് പിന്നാലെ പ്രശ്നപരിഹാരത്തിന് സുരേഷ് ​ഗോപി സേവാഭാരതിയുടെ ആംബുലൻസിലാണ് വന്നിറങ്ങിയത്. മറ്റ് വാഹനങ്ങൾക്ക് പ്രവേശനമില്ലാതെ അടച്ചിട്ട മേഖലയിലേക്ക് സുരേഷ് ​ഗോപി ആംബുലൻസിൽ എത്തിയതിന്  പിന്നിൽ ​ഗൂഢാലോചന ഉണ്ടെന്ന് എൽഡിഎഫും യുഡിഎഫും ആരോപണം ഉന്നയിച്ചിരുന്നു. എന്നാൽ ആരോ​ഗ്യ പ്രശ്നം കാരണമാണ് ആംബുലൻസ് ഉപയോ​ഗിച്ചതെന്നാണ് ബിജെപി നോതക്കളുടെ വാദം.

പൂരന​ഗരിയിൽ തിരുവമ്പാടി ദേവസ്വം പ്രതിനിധികളുമായി ചർച്ച നടത്താൻ ആദ്യമെത്തിയ നേതാക്കളിലൊരാൾ സുരേഷ് ​ഗോപിയായിരുന്നു. പൂരം നിലച്ചയുടനെ സുരേഷ് ​ഗോപിയെ ആംബുലൻസിൽ എത്തിച്ചത് ദുരൂഹമാണെന്ന് എൽഡിഎഫ് സ്ഥാനാർത്ഥിയായിരുന്ന വി.എസ് സുനിൽ കുമാർ ആരോപിച്ചിരുന്നു.