PT Seven Wild Elephant : ഭീതിപരത്തിയ പിടി സെവൻ ഒടുവിൽ കൂട്ടിലായി; ധോണിയിലെ ജനങ്ങൾക്ക് ആശ്വാസം
PT Seven Wild Elephant : മയക്ക് വെടി വെച്ച ശേഷം കുങ്കിയാനകളുടെ സഹായത്തോടെ ലോറിയിൽ കയറ്റിയ പിടി സെവനിനെ വീണ്ടും മയക്കുവെടി വെച്ചതിന് ശേഷമാണ് കൂട്ടിൽ ആക്കിയത്.
ധോണിയിലെ ജനവാസമേഖലയിൽ ഭീതിപരത്തിയ പിടി സെവനെ കൂട്ടിലാക്കി. ധോണി സെക്ഷൻ ഫോറെസ്റ്റ് ഓഫീസിലെ കൂട്ടിലാണ് പിടി സെവനെ അടച്ചിരിക്കുന്നത്. മയക്ക് വെടി വെച്ച ശേഷം കുങ്കിയാനകളുടെ സഹായത്തോടെ ലോറിയിൽ കയറ്റിയ പിടി സെവനിനെ വീണ്ടും മയക്കുവെടി വെച്ചതിന് ശേഷമാണ് കൂട്ടിൽ ആക്കിയത്. 140 യൂക്കാലിപ്സ് മരം കൊണ്ടു ഉണ്ടാക്കിയ കൂട്ടിലാണ് ഇപ്പോൾ പിടി സെവൻ ഉള്ളത്. ഇനി കുറച്ച് കാലം പിടി സെവൻ ഈ കൂട്ടിനുള്ളിൽ തന്നെയാകും. നാല് വർഷങ്ങൾ ഈ കൂട് ഉപയോഗിക്കാൻ കഴിയും. പിടി സെവൻ കൂട്ടിലായതിന് പിന്നാലെ ആശ്വാസം അറിയിച്ച് ധോണിയിലെ ജനങ്ങളും രംഗത്തെത്തി.
ചീഫ് വെറ്റിനറി സർജൻ ഡോ. അരുൺ സഖറിയയയുടെ നേതൃത്വത്തിലുള്ള ദൗത്യ സംഘമാണ് മയക്കുവെടിവെച്ചത്. ധോണിയിലെ കോർമ എന്ന സ്ഥലത്താണ് ആനയെ കണ്ടെത്തിയത്. മുണ്ടൂരിനും ധോണിക്കുമിടയിലെ വനാതിർത്തിക്കടുത്ത് കണ്ടെത്തിയ ഒറ്റയാനെ വനംവകുപ്പ് നിരീക്ഷിച്ച് വരികയായിരുന്നു. 75 അംഗ ദൗത്യ സംഘമാണ് കാട്ടാനയെ പിടികൂടിയത്.
ALSO READ: Wild elephant: ജനവാസ മേഖലയിൽ ഭീതിപരത്തിയ പിടി സെവനെ മയക്കുവെടിവച്ചു; ധോണിയിലെ കൂട്ടിലെത്തിക്കും
മുത്തങ്ങയിൽ നിന്ന് വിക്രം, ഭരതന്‍, സുരേന്ദ്രൻ എന്നീ കുങ്കിയാനകളെ ഉപയോഗിച്ചാണ് ആനയെ ലോറിയിൽ കയറ്റിയത്. ആദ്യം ഒരു കുങ്കിയാനയുടെ സഹായത്തോടെ പിടി സെവനെ ലോറിയിൽ കയറ്റാൻ ശ്രമിച്ചെങ്കിലും നടക്കാതെ വന്നതിനെ തുടർന്ന് മറ്റ് 2 കുങ്കിയാനകളെ കൂടി സ്ഥലത്ത് എത്തിക്കുകയായിരുന്നു. ആനയുടെ കാലുകൾ വടം കെട്ടി ബന്ധിപ്പിക്കുകയും കണ്ണുകൾ കറുത്ത തുണി കൊണ്ട് മൂടുകയും ചെയ്തിരുന്നു. പിന്നീട് ഈ തുണി നീക്കം ചെയ്തു.
ഇന്നലെ മയക്കുവെടിവച്ച് പിടികൂടാൻ ശ്രമിച്ചെങ്കിലും പിടി സെവൻ ചെങ്കുത്തായ മലയിടുക്കിൽ നിലയുറപ്പിച്ചതിനെ തുടർന്ന് ഇന്നലത്തെ ദൗത്യം അവസാനിപ്പിക്കുകയായിരുന്നു. കഴിഞ്ഞ ഏഴുമാസമായി പാലക്കാട് ധോണിയിലെ ജനവാസമേഖലയിൽ ഇറങ്ങി ഭീതി പരത്തിയ ആനയാണ് പിടി സെവൻ. 2022 ജൂലൈ എട്ടിന് പ്രഭാതസവാരിക്കിറങ്ങിയ പ്രദേശവാസി ശിവരാമനെ കൊലപ്പെടുത്തിയ, നിരവധി കൃഷിയിടങ്ങള്‍ നശിപ്പിച്ചു. മയക്കുവെടിവച്ച് ആനയെ പിടികൂടാൻ മാസങ്ങൾക്ക് മുൻപേ തീരുമാനം എടുത്തിരുന്നെങ്കിലും പിന്നീട് വനംവകുപ്പ് നിലപാട് മാറ്റി. പ്രതിഷേധം ശക്തമായതിനെ തുടര്‍ന്നാണ് ആനയെ മയക്കുവെടിവച്ച് പിടികൂടാൻ വീണ്ടും തീരുമാനിച്ചത്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...