Question Paper Leaked: ലാപ്ടോപ്പിൽ നിന്ന് ചോദ്യപേപ്പർ കണ്ടെത്താനായില്ല, ഷുഹൈബിനെ കസ്റ്റഡിയിലെടുക്കാൻ നീക്കം

കോഴിക്കോട്: ക്രിസ്മസ് പരീക്ഷ ചോദ്യപേപ്പർ ചോർന്നതുമായി ബന്ധപ്പെട്ട് എംഎസ് സൊല്യൂഷൻസ് സി.ഇ.ഒ ഷുഹൈബിനെ കസ്റ്റഡിയിലെടുത്ത് ചോദ്യം ചെയ്യാൻ ക്രൈബ്രാഞ്ച് നീക്കം. ഷുഹൈബിന് വേണ്ടിയുള്ള അന്വേഷണം ഊ‍ർജിതമാക്കി. എഫ്.ഐ.ആർ രജിസ്റ്റർ ചെയ്തതിന് പിന്നാലെ ഷുഹൈബ് ഒളിവിൽ പോയതായി സൂചന. 

അതേസമയം റെയ്ഡിൽ പിടിച്ചെടുത്ത ഷുഹൈബിന്റെ ലാപ്ടോപിൽ നിന്ന് ചോദ്യപേപ്പർ കണ്ടെത്താനായില്ല. മൊബൈൽ ഫോണും ലാപ്ടോപും ഫൊറൻസിക് പരിശോധനയ്ക്ക് അയക്കുമെന്ന് പൊലീസ് പറഞ്ഞു.

ചോദ്യപേപ്പർ ചോർന്നതുമായി ബന്ധപ്പെട്ട് എംഎസ് സൊല്യൂഷൻസിന്റെ കൊടുവള്ളിയിലെ ആസ്ഥാനത്തും ഷുഹൈബിന്റെ വീട്ടിലും പൊലീസ് റെയ്ഡ് നടത്തിയിരുന്നു. ആറു മണിക്കൂർ നീണ്ട പരിശോധനയിൽ ചാനലിന്റെ ഓഫീസിൽ നിന്നും ലാപ്ടോപ്, ഹാർഡ് ഡിസ്ക്, മൊബൈൽ ഫോൺ എന്നിവ പിടിച്ചെടുത്തു.

ഗൂഢാലോചന, വിശ്വാസ വഞ്ചന, തട്ടിപ്പ് ഉള്‍പ്പെടെയുള്ള ഏഴ് വകുപ്പുകളാണ് എംഎസ് സൊല്യൂഷൻസിനെതിരെ ചുമത്തിയിട്ടുള്ളത്. സ്ഥാപനത്തിലെ ജീവനക്കാരെയും ചില എയ്ഡഡ് സ്കൂള്‍ അധ്യാപകരേയും അന്വേഷണ പരിധിയില്‍ ഉള്‍പ്പെടുത്തിയിട്ടുണ്ട്.