Rahul Mamkootathil: പണമെന്ന് തെളിയിച്ചാൽ പ്രചരണം നിർത്തും; നീല ട്രോളിബാഗുമായി രാഹുൽ

പാലക്കാട്: അനധികൃത പണം എത്തിച്ചുവെന്നാരോപിച്ച നീല ട്രോളി ബാഗുമായി രാഹുൽ മാങ്കൂട്ടത്തിൽ വാർത്താസമ്മേളനം നടത്തി. പെട്ടിയിലുണ്ടായിരുന്നത് വസ്ത്രങ്ങളായിരുന്നുവെന്നും അതിനുള്ളിൽ പണമാണെന്ന് തെളിയിച്ചാൽ തെരഞ്ഞെടുപ്പ് പ്രചരണം ഇവിടെ നിർത്തുമെന്നും രാഹുൽ തുറന്നടിച്ചു. 

കെ പി എം ഹോട്ടൽ അധികൃതരും പൊലീസും സിസിടിവി ദൃശ്യങ്ങൾ പുറത്തു വിടണമെന്ന് രാഹുൽ ആവശ്യപ്പെട്ടു. താൻ ഹോട്ടലിൽ വന്നതും പോയതും എപ്പോഴാണെന്ന് അതിൽ നിന്നും മനസിലാകുമെന്നും രാഹുൽ പറഞ്ഞു. നീല ട്രോളി ബാ​ഗിൽ തന്റെ വസ്ത്രങ്ങളായിരുന്നുവെന്നും ആ ബാ​ഗ് ഇപ്പോഴും എന്റെ കൈവശമുണ്ടെന്നും രാഹുൽ വ്യക്തമാക്കി. 

പൊലീസിന് ഈ ബാ​ഗ് കൈമാറാൻ തയാറാണ്. കള്ളപ്പണ ഇടപാട് നടന്നുവെഹ്കിൽ പൊലീസ് എന്തുകൊണ്ട് അത് തെളിയിക്കുന്നില്ല. ബാ​ഗിനകത്ത് ഒരു രൂപ ഉണ്ടായിരുന്നുവെന്ന് തെളിയിച്ചാൽ പ്രചരണം ഇവിടെ നിർത്തും. ബോഡ് റൂമിൽ വെച്ച് ഈ ബാ​ഗ് തുറന്നു നോക്കിയിട്ടുണ്ട്. ആ സിസിടിവി ദൃശ്യവും പരിശോധിക്കട്ടെ. കറുത്ത ബാഗ് കൂടി കൈയിൽ ഉണ്ടായിരുന്നു. പണം ഉണ്ടെന്നാണ് പറയുന്നതെങ്കിൽ അതെവിടെ എന്നും പറയുന്നവർ തെളിയിക്കണമെന്നും രാഹുൽ മാങ്കൂട്ടത്തിൽ പറഞ്ഞു.