Wild Animal: തൊടുപുഴയിൽ പുള്ളിപുലി സാന്നിധ്യം സ്ഥിതീകരിച്ചു; നിരവധി വളർത്തുമൃഗങ്ങളെ ആക്രമിച്ചു കൊന്നതായി പരാതി

തൊടുപുഴ കരിങ്കുന്നം ഇല്ലിചാരിയിൽ ആഴ്‍ചകൾക്ക് മുമ്പ് നിരവധി വളർത്തുമൃഗങ്ങളെ ആക്രമിച്ച് കൊന്ന അജ്ഞാതജീവി പുള്ളിപ്പുലിയാണെന്ന് സ്ഥിരീകരിച്ചു. വളർത്തുമൃഗങ്ങളെ ആക്രമിച്ചതോടെ വനം വകുപ്പ് സ്ഥാപിച്ച സി സി ടിവിയിലാണ് പുള്ളിപ്പുലിയുടെ ദൃശ്യങ്ങൾ പതിഞ്ഞത്.അടുത്തിടെ കരിങ്കുന്നം ഇല്ലിചാരി മേഖലയിൽ ഒട്ടേറെ വളർത്തു മൃഗങ്ങൾ അജ്ഞാത ജീവിയുടെ ആക്രമണത്തിൽ കൊല്ലപ്പെട്ടിരുന്നു. ഇതോടെയാണ് ആക്രമണമുണ്ടായ സ്ഥലങ്ങളില്‍ വനം വകുപ്പ് ക്യാമറ സ്ഥാപിച്ചത്. 

രണ്ടുദിവസം മുമ്പ് ഇതില്‍ പതിഞ്ഞ ദൃശ്യങ്ങളില്‍നിന്നാണ് പുള്ളിപ്പുലിയാണെന്ന് സ്ഥിരീകരിച്ചത്. വനംവകുപ്പ് ഉദ്യോഗസ്ഥരാണ് ഇക്കാര്യം വ്യക്തമാക്കിയത്. പ്രദേശവാസികളായ മൂന്ന് പേരുടെ മൃഗങ്ങളാണ് ആക്രമണത്തിൽ  ചത്തത്. 15 വളര്‍ത്തുമൃഗങ്ങളാണ് അക്രമണത്തിന് ഇരയായത്. ഇല്ലിചാരി മേഖലയുടെ ഒരു ഭാഗം വനം വകുപ്പിന്റെ റിസർവ് മേഖലയിലാണ്. ഇക്കഴിഞ്ഞ 16 ന് വൈകിട്ടാണ് ക്യാമറയിൽ പുലിയുടെ ചിത്രം പതിഞ്ഞത്. 

ഇടുക്കിയുടെ ഹൈറേഞ്ച് മേഖലകളിൽ പുലി ഇറങ്ങുന്നത് പതിവാണെങ്കിലും ലോറേഞ്ച് മേഖലയിൽ ഇതിനു മുമ്പ് പുലി ഇറങ്ങിയത് ഒരു തവണ മാത്രമാണ്. പുലിയെ കൂടുവച്ച് പിടിക്കാൻ തിരുവനന്തപുരത്തെ ചീഫ് വൈൽഡ് ലൈഫ് വാർഡൻ ഓഫീസിൽനിന്ന് അനുമതി വേണം. അതിനുള്ള നടപടികള്‍ തുടങ്ങിയതായി വനംവകുപ്പ് അധികൃതര്‍ പറഞ്ഞു. അതേസമയം ആശങ്കപെടേണ്ട സാഹചര്യമില്ലെന്നും ജാഗ്രത പാലിക്കണമെന്നും അധികൃതർ അറിയിച്ചു.