Suicide Threat: ഹാജർ വെട്ടിക്കുറച്ചുവെന്നാരോപണം; കോളേജ് കെട്ടിടത്തിന് മുകളിൽ കയറി വിദ്യാർത്ഥിയുടെ ആത്മഹത്യ ഭീഷണി

പത്തനംതിട്ട: പത്തനംതിട്ട മൗണ്ട് സിയോൺ ലോ കോളേജിൽ വിദ്യാർത്ഥി കെട്ടിടത്തിന് മുകളിൽ കയറി ആത്മഹത്യ ഭീഷണി മുഴക്കി. മൂന്നാം സെമസ്റ്റർ വിദ്യാർത്ഥി അശ്വിനാണ് ആത്മഹത്യ ഭീഷണി മുഴക്കിയത്. അനധികൃതമായി ഹാജർ വെട്ടിക്കുറച്ചുവെന്നാരോപിച്ചാണ് അശ്വിന്റെ ആത്മഹത്യാ ഭീഷണി. മറ്റ് വിദ്യാർത്ഥികളും ഹാജർ വെട്ടിക്കുറച്ചുവെന്നാരോപിച്ച് കോളജിൽ പ്രതിഷേധം നടത്തുന്നുണ്ട്. അനുനയ ശ്രമത്തിനൊടുവിൽ വിദ്യാർത്ഥി താഴെയിറങ്ങി.

അതിനിടെ, സംഭവത്തിൽ അനുനയ ശ്രമവുമായി മാനേജ്മെന്റ് പ്രതിനിധികൾ രം​ഗത്തെത്തിയിരുന്നു. അശ്വിനടക്കം നിരവധി വിദ്യാർത്ഥികൾക്കാണ് ഡിറ്റൻഷൻ നടപടി നേരിടേണ്ടി വന്നതെന്ന് വിദ്യാർത്ഥികൾ പറഞ്ഞു. അന്യായമായിട്ടാണ് ഡിറ്റൻഷൻ ചെയ്തതെന്ന് ഹൈക്കോടതി കണ്ടെത്തിയിട്ടും വിദ്യാർത്ഥികളെ കോളേജിലേക്ക് തിരിച്ചു കയറ്റുന്നില്ലെന്നായരുന്നു വിദ്യാർത്ഥികളുടെ ആരോപണം. ഈ നിലപാട് തുടരുന്ന പ്രിൻസിപ്പൽ കോളേജിൽ തുടരുന്നതിൽ ആശങ്കയുണ്ടെന്ന് വിദ്യാർത്ഥികൾ പറഞ്ഞു.

ഡിറ്റൻഷൻ നടപടി നേരിട്ട എല്ലാവരേയും തിരിച്ചെടുക്കാമെന്ന് അഡ്മിനിസ്ട്രേറ്റർ സ്ഥലത്തെത്തി ഉറപ്പ് നൽകി. വിദ്യാർത്ഥികൾക്കെതിരായ നടപടി തിരുത്തണമെന്ന് സർവ്വകലാശാലയോട് ആവശ്യപ്പെട്ടിട്ടുണ്ടെന്ന് കോളേജ് പ്രിൻസിപ്പൽ ഗിഫ്റ്റി ഉമ്മൻ പറ‍ഞ്ഞു. ഉറപ്പ് എഴുതി നൽകിയാൽ മാത്രമേ പ്രതിഷേധത്തിൽ നിന്ന് പിന്തിരിയൂ എന്നായിരുന്നു വിദ്യാർത്ഥികളുടെ നിലപാട്.