T Siddique: സുരേന്ദ്രനല്ല മോദി വിചാരിച്ചാലും സുൽത്താൻ ബത്തേരി ഗണപതിവട്ടമാവില്ല: ടി സിദ്ദിഖ്

വയനാട്: താൻ വിജയിച്ചാൽ സുൽത്താൻ ബത്തേരിയുടെ പേര് മാറ്റി ​ഗണപതിവട്ടം എന്നാക്കി മാറ്റും എന്ന എന്‌ഡിഎ സ്ഥാനാർത്ഥി കെ സുരേന്ദ്രന്റെ പ്രസ്താവനയ്ക്കെതിരെ ടി സിദ്ദിക്ക്. സുരേന്ദ്രനല്ല മോദി വിചാരിച്ചാലും സുൽത്താൻ ബത്തേരിയുടെ പേര് മാറ്റി ​ഗണപതിവട്ടം ആക്കാൻ സാധിക്കില്ലെന്നും, അതിനുള്ള പ്രാപ്തിയും, കഴിവും സുരേന്ദ്രനില്ലെന്നും സിദ്ധിഖ് വിമർശിച്ചു. ജനശ്രദ്ധ ലഭിക്കാൻ വേണ്ടി മാത്രമാണ് ഇത്തരത്തിൽ പ്രസ്താവനകൾ ഇറക്കുന്നതെന്നും അദ്ദേഹം കൂട്ടിച്ചേർത്തു. 

ടിപ്പു സുൽത്താന്റെ അധിനിവേശത്തിനി ശേഷമാണ് ഈ പ്രദേശത്തിന് സുൽത്താൻ ബത്തേരി എന്ന പേര് വന്നതെന്നാണ് കെ സുരേൻ്രൻ പറഞ്ഞത്. ഇത്തവണ തിരഞ്ഞെടുപ്പിൽ ജയിച്ചാൽ സുൽത്താൻ ബത്തേരിയുടെ പേര് ഗണപതി പട്ടം എന്നാക്കി മാറ്റാനാകും പ്രഥമ പരിഗണന നൽകുമെന്നും അദ്ദേഹം കൂട്ടിച്ചേർത്തു. പ്രാചീനകാലത്ത് ഈ സ്ഥലത്തിന് ഗണപതി വട്ടം എന്നായിരുന്നു പേര്. 1984ൽ ബിജെപി നേതാവായിരുന്ന പ്രമേദ് മഹാജൻ വയനാട് സന്ദർശിച്ചപ്പോൾ ഇത് സുൽത്താൻ ബത്തേരി അല്ല ഗണപതി വട്ടം ആണെന്ന് പറഞ്ഞിരുന്നുവെന്നും അദ്ദേഹം പറഞ്ഞു.

റിപ്പബ്ലിക്കിന് നൽകിയ അഭിമുഖത്തിലായിരുന്ന സുരേന്ദ്രൻ ഇതേ കുറിച്ച് സംസാരിച്ചത്. അതേസമയം വയനാട് മണ്ഡലത്തിൽ കെ സുരേന്ദ്രന് എതിരായി കോൺഗ്രസിന്റെ രാഹുൽ ഗാന്ധിയാണ് മത്സരിക്കുന്നത്. രാഹുൽ ഗാന്ധി വയനാട് സിറ്റിങ് എംപിയാണ്. ആനി രാജെയാണ് എൽഡിഎഫ് സ്ഥാനാർഥി. ഏപ്രിൽ 26നാണ് കേരളത്തിൽ ലോക്സ്ഭ തിരഞ്ഞെടുപ്പ്. ഒറ്റ ഘട്ടമായിട്ടാണ് തിരഞ്ഞെടുപ്പ് സംഘടിപ്പിക്കുന്നത്. ജൂൺ നാലാം തിയതിയാണ് വോട്ടെണ്ണൽ.