Munnar: തണുത്ത് വിറച്ച് മൂന്നാർ; പലയിടത്തും തണുപ്പ് 0 ഡിഗ്രിയിൽ താഴെ

ഇടുക്കി: കാലംതെറ്റി മഴ പെയ്തതിനെ തുടർന്ന് മാറി നിന്ന മഞ്ഞുകാലം മൂന്നാറിൽ മടങ്ങിയെത്തി. ഇതോടെ മൂന്നാർ അതിശൈത്യത്തിലേക്ക് കടന്നിരിക്കുകയാണ്. കഴിഞ്ഞ ദിവസം ഗുണ്ടുമല, ദേവികുളം എന്നിവിടങ്ങളിൽ തണുപ്പ് 0 ഡിഗ്രിയിൽ താഴെ എത്തി.

കാലവർഷം പെട്ടെന്ന് വിടവാങ്ങിയെങ്കിലും കാലം തെറ്റി പെയ്ത മഴ മൂലം ഇത്തവണ അതിശൈത്യം മൂന്നാറിലെത്താൻ വിനോദ സഞ്ചാരികൾക്ക് മാസങ്ങൾ കാത്തിരിക്കേണ്ടി വന്നു. സാധാരണ ഡിസംബർ ആദ്യവാരത്തോടെ മൂന്നാറും പരിസരവും മഞ്ഞുകൊണ്ട് മൂടും. പുലർച്ചെ മുതൽ രാവിലെ 8 മണി വരെ ഇതാവും മൂന്നാറിന്റ അവസ്ഥ. എന്നാൽ ഇത്തവണയാകട്ടെ തണുപ്പ് എത്താൻ ജനുവരി അവസാനം വരെ കാത്തിരിക്കേണ്ടി വന്നു വിനോദസഞ്ചാരികളടക്കമുള്ള ആളുകൾക്ക്. 

കഴിഞ്ഞ ദിവസം ഗുണ്ടുമല, ദേവികുളം മേഖലയിൽ തണുപ്പ പൂജ്യം ഡിഗ്രിയിൽ താഴെ എത്തി. ഇതോടെ പുൽമേടുകൾ തേയിലത്തോട്ടങ്ങൾ എന്നിവിടങ്ങൾ മഞ്ഞുതുള്ളികളാൽ മൂടിയിരിക്കുകയാണ്. വരും ദിവസങ്ങളിൽ തണുപ്പ് മൈനസ് ഡിഗ്രിയിലെത്തുമെന്നാണ് കരുതപ്പെടുന്നത്. ഇതോടെ മൂന്നാറിലേക്കുള്ള വിനോദ സഞ്ചാരികളുടെ ഒഴുക്ക് വർദ്ധിക്കും.