കാട്ടാനക്കൂട്ടത്തെ കണ്ട് ഭയന്നു; ആനയിറങ്കൽ ജലാശയത്തിൽ വള്ളം മറിഞ്ഞ് രണ്ട് പേരെ കാണാതായി

ഇടുക്കി: ആനയിറങ്കൽ ജലാശയത്തിൽ വള്ളം മറിഞ്ഞ് രണ്ട് പേരെ കാണാതായി. 301 കോളനി നിവാസികളായ ഗോപിനാഥൻ, സജീവൻ എന്നിവരെയാണ് കാണാതായത്. പൂപ്പാറയിൽ പോയി സാധങ്ങൾ വാങ്ങി തിരികെ വരുന്നതിനിടെ ഉച്ചയ്ക്ക് 12.30 ഓടെയാണ് അപകടം ഉണ്ടായത്. 

301 കോളനിക്ക് താഴ് ഭാഗത്തായാണ് അപകടം ഉണ്ടായത്. വള്ളം മറിഞ്ഞതിനെ തുടർന്ന് നിലവിളി ശബ്ദം കേട്ട് എത്തിയ ഗോപിയുടെ മരുമകൻ രഞ്ജിത്താണ് ഇരുവരും മുങ്ങിത്താഴുന്നത് കണ്ടത്. തുടർന്ന് പ്രദേശവാസികളെയും ഫയർ ഫോഴ്സിനെയും വിവരം അറിയിച്ചു. മൂന്നാറിൽ നിന്ന് എത്തിയ ഫയർ ഫോഴ്‌സ് തിരച്ചിൽ ആരംഭിച്ചു. 

കാട്ടാനയെ കണ്ട് ഭയന്ന് നിയന്ത്രണം വിട്ടത്തോടെയാണ് വള്ളം മറിഞ്ഞതെന്ന് നാട്ടുകാർ പറയുന്നു. മൂന്നാർ ഫയർഫോഴ്സിന്റെയും നാട്ടുകാരുടെയും നേതൃത്വത്തിൽ തെരച്ചിൽ തുടരുകയാണ്. ജലശയത്തിന്റെ ഇരുകരകളിലും കാട്ടാനക്കൂട്ടം നിലയുറപ്പിച്ചിട്ടുണ്ട്. ഇത് തെരച്ചിലിന് പ്രതിസന്ധി സൃഷ്ടിയ്ക്കുമോ എന്ന ആശങ്കയും ഉണ്ട്.