Ayodhya train from Kerala: അയോധ്യയിലേക്കു കേരളത്തിൽനിന്നുള്ള ആദ്യ ട്രെയിൻ റദ്ദാക്കി; ഉത്തരേന്ത്യൻ തീർത്ഥാടകർ കാരണമെന്ന് റെയിൽവേ

പാലക്കാട്: പാലക്കാട് ജം​ഗ്ഷനിൽ നിന്നും ഇന്ന് അയോധ്യയിലേക്ക് തീർത്ഥാടകരുമായി പുറപ്പെടേണ്ടിയിരുന്ന അയോധ്യ ആസ്താ സപെഷൽ ട്രെയിൻ റദ്ദാക്കിയതായി റെയിൽവേ. ഉത്തരേന്ത്യയിൽ നിന്നുള്ള തീർത്ഥാടകരുടെ വൻ തിരക്കാണ് ഇതിനു കാരണമെന്നാണ് റെയിൽവേ ഇതിന് വിശദീകരണം നൽകുന്നത്.  

യാത്രക്കാരുടെ എണ്ണം വർദ്ധിച്ചതോടെ ആവശ്യത്തിന് കോച്ചുകൾ ലഭിക്കാത്തതാണ് കാരണമെന്ന് റെയിൽവേ പറഞ്ഞു. 
ബുക്ക് ചെയ്ത യാത്രക്കാരെ പുതുക്കിയ തീയ്യതി പിന്നീട് അറിയിക്കുമെന്നും റെയിൽവേ വ്യക്തമാക്കി. മുൻകൂട്ടി പറഞ്ഞ തീയ്യതികളിൽ മാറ്റമുണ്ടായാലും അത് നേരത്തെ അറിയിക്കും. കൂടാതെ തിരുവനന്തപുരത്തു നിന്നുള്ള ട്രെയിനും ഉണ്ടാകില്ല. 

അയോധ്യയിലേക്കുള്ള യാത്രയുമായി ബന്ധപ്പെട്ടു റെയിൽവേ ഇതുവരെ വിജ്ഞാപനം പുറത്തിറക്കിയിട്ടില്ലെന്നും ഫെബ്രുവരി രണ്ടാം ആഴ്ച്ചയോടെ ഇതിനെക്കുറിച്ച് വ്യക്തത വരുമെന്നാണ് തിരുവനന്തപുരം ‍ഡിവിഷൻ പിആർഒ അറിയിച്ചത്. കേരളത്തിൽ നിന്നും അയോധ്യയിലേക്ക് പാലക്കാട് നിന്നുമുള്ള ആദ്യ സർവ്വീസ് ആണ് ഇന്നു മുടങ്ങിയത്.