Kerala High Court: ഹൈക്കോടതി അനുമതി നൽകി; വിഷു ചന്തകൾ ഇന്ന് മുതൽ സജീവമാകും

തിരുവനന്തപുരം: സംസ്ഥാനത്ത് വിഷു ചന്തകൾ ഇന്ന് മുതൽ സജീവമാകും. ചന്തകൾ തുടങ്ങാനുള്ള അനുമതി കോടതി നൽകിയതോടെയാണ് കൺസ്യൂമർഫെഡിന് നിർദ്ദേശം നൽകിയിരിക്കുന്നത്. റംസാൻ, വിഷു വിപണന മേളകൾക്ക് തെരഞ്ഞെടുപ്പ് സമയമായതിനാലാണ് സർക്കാർ അനുമതി നിഷേധിച്ചിരുന്നത്. ഉപാധികളോടെയാണ് വിഷുച്ചന്ത തുടങ്ങാൻ കൺസ്യൂമർ ഹെഡിന് അനുമതി നൽകിയിരിക്കുന്നത്. വിപണന മേളകൾ സർക്കാർ ഒരു തരത്തിലുമുള്ള പ്രചരണങ്ങൾക്കായി ഉപയോ​ഗിക്കരുതെന്ന് ജസ്റ്റിസ് ദേവൻ രാമചന്ദ്രൻ ഉത്തരവിറക്കി. 

13 ഇന സാധനങ്ങൾ വിലക്കുറവിൽ ഇന്നു മുതൽ വിഷു അവസാനിക്കുന്നത് വരെയുള്ള ഒരാഴ്ച്ച കണ്ഡസ്യൂമർഫെഡിൽ നിന്നും ലഭ്യമാകും. എല്ലാ ഔട്ട്ലെറ്റുകളിലും സാധനങ്ങൾ എത്തിച്ചിട്ടുണ്ടെന്നാണ് സർക്കാർ അറിയിച്ചിരിക്കുന്നത്. അതേസമയം ചന്തകളുടെ നടത്തിപ്പുമായി ബന്ധപ്പെട്ട് തെരഞ്ഞെടുപ്പ് പെരുമാറ്റ ചട്ടലംഘനം കണ്ടെത്തുകയാണെങ്കിൽ തെരഞ്ഞെടുപ്പ് കമ്മീഷന് വിഷയത്തിൽ ഇടപെടാമെന്നും ഹൈക്കോടതി ഉത്തരവിൽ വ്യക്തമാക്കിയിട്ടുണ്ട്. കൺസ്യൂമർഫെഡ് തെരഞ്ഞെടുപ്പ് കമ്മീഷൻ ഏർപ്പെടുത്തിയ വിലക്കിനെതിരെ നൽകിയ ഹർജി രാവിലെ പരി​ഗണിച്ചപ്പോൾ സർക്കാറിനെതിരെ കോടതി വിമർശനമുന്നയിച്ചിരുന്നു. മനുഷ്യന്റെ ​ഗതികേട് മുതലെടുത്ത് വോട്ട് തേടെരുതെന്നായിരുന്നു വിമർശനം.