Wayanad Tiger: ഒടുവിൽ കെണിയിൽ വീണു..! വയനാട്ടിലെ നരഭോജി കടുവയെ വെടിവെച്ച് കൊല്ലണമെന്ന് നാട്ടുകാർ

സുൽത്താൻബത്തേരി: യുവകർഷകനെ കൊലപ്പെടുത്തി ദിവസങ്ങളോളം നാടിനെ വിറപ്പിച്ച കടുവ ഒടുവിൽ കെണിയിൽ വീണു. പൂതാടി മൂടക്കൊല്ലിയില്‍ യുവാവിനെ കൊന്ന കടുവയെയാണ് വനംവകുപ്പ് കൂട്ടിലാക്കിയത്. കൂട് യുവാവിനെ കൊലപ്പെടുത്തിയ സ്ഥലത്തിനു സമീപത്തായിരുന്നു സ്ഥാപിച്ചത്. എന്നാൽ കടുവയെ കിട്ടിയതോടെ രോഷാകുലാരായി നാട്ടുകാർ  കടുവയെ വെടിവെച്ചു കൊല്ലണമെന്നാവശ്യപ്പെട്ട് പ്രതിഷേധമാരംഭിച്ചു. ജീവനോടെ കടുവയെ കൊണ്ടു പോകാന്‍ സമ്മതിക്കില്ലെന്ന നിലപാടിലാണവര്‍. 

കടുവയുമായെത്തിയ വനംവകുപ്പിന്റെ വാഹനം തടഞ്ഞ് മുദ്രാവാക്യം വിളിച്ചുകൊണ്ടാണ് പ്രതിഷേധം. മയക്കുവെടി വെയ്ക്കുക അല്ലെങ്കില്‍ കൂട്ടിലാക്കുക അതിനു കഴിയാതെ വന്നാല്‍ മാത്രം വെടിവെച്ചു കൊല്ലുക എന്നതായിരുന്നു ഫോറസ്റ്റ് കണ്‍സര്‍വേറ്ററുടെ നേരത്തെയുള്ള ഉത്തരവ്‌. കടുവയെ പിടികൂടാനുള്ള ശ്രമം ദിവസങ്ങളായി വനംവകുപ്പ് തുടരുകയായിരുന്നു. കുങ്കിയാനകളെയുൾപ്പടെ എത്തിച്ച് തിരച്ചിൽ തുടരുന്നതിനിടെയാണ് കടുവ കൂട്ടിലായത്. നൂറു പേരടങ്ങുന്ന ഉദ്യോഗസ്ഥരാണ് ദൗത്യസംഘത്തിലുണ്ടായിരുന്നത്. ക്ഷീരകർഷകനായ പ്രജീഷിനെ കൊന്ന് പത്തുദിവസത്തിനു ശേഷമാണ് കടുവ കുടുങ്ങുന്നത്.