MT Vasudevan Nair: എം.ടിയുടെ വീട്ടിലെ മോഷണം; പാചകക്കാരിയും ബന്ധുവും പിടിയിൽ

പ്രശസ്ത സാഹിത്യക്കാരൻ എം.ടി വാസുദേവൻ നായരുടെ വീട്ടിലെ കവർച്ചയിൽ പ്രതികൾ പിടിയിൽ. എംടിയുടെ വീട്ടിലെ പാചകക്കാരിയെയും അവരുടെ ബന്ധുവിനെയും നടക്കാവ് പൊലീസ് കസ്റ്റ‍ഡിയിലെടുത്തു. കുടുംബവുമായി അടുത്ത് ഇടപഴകിയവരെ പൊലീസ് ചോദ്യം ചെയ്തതിന് പിന്നാലെയാണ് ജോലിക്കാരെ കസ്റ്റഡിയിലെടുത്തത്. പ്രതികളെ ചോദ്യം ചെയ്ത് വരികയാണ്.

കിഴക്കെ നടക്കാവ് കൊട്ടാരം റോഡിലെ വീട്ടിൽ സൂക്ഷിച്ചിരുന്ന 26 പവന്റെ സ്വർണാഭരണങ്ങളാണ് മോഷണം പോയത്. സെപ്റ്റംബർ 22നും 30നും ഇടയിലാണ് മോഷണം നടന്നത് എന്നാണ് പരാതിയിൽ പറയുന്നത്. 

മൂന്ന് മാല, വള, കമ്മൽ, ഡയമണ്ട് കമ്മൽ ലോക്കറ്റ്, മരതകം പതിച്ച ലോക്കറ്റ് എന്നിവയാണ്  മോഷണം പോയത്. സ്വർണം ബാങ്ക് ലോക്കറിലാണെന്നാണ് കുടുംബം ആദ്യം വിചാരിച്ചത്. എന്നാൽ പരിശോധനയിൽ വീട്ടിലും ലോക്കറിലും ആഭരണങ്ങൾ ഇല്ലെന്ന് കണ്ടെത്തിയതിനെ തുടർന്നാണ് സ്വർണം മോഷണം പോയെന്ന് വീട്ടുകാർക്ക് മനസിലായത്. 

അലമാര കുത്തിപ്പൊളിച്ചതിന്റെയോ വീട്ടിൽ കവർച്ച നടന്നതിന്റെയോ ലക്ഷണങ്ങളില്ല. അതിനാൽ അലമാരയുള്ള മുറിയിൽ തന്നെ ഒരിടത്തുവെച്ചിരുന്ന താക്കോലെടുത്ത് അലമാര തുറന്നെന്നായിരുന്നു പൊലീസിന്റെ പ്രാഥമിക നിഗമനം.