Thomas Cherian: 56 വർഷങ്ങൾക്ക് ശേഷം ജന്മനാട്ടിൽ തോമസ് ചെറിയാന് അന്ത്യവിശ്രമം; അന്ത്യാജ്ഞലി അർപ്പിച്ച് ജന്മനാട്

പത്തനംതിട്ട: 56 വർഷം മുൻപ് ലേ ലഡാക്കിൽ വിമാനാപകടത്തിൽ മരിച്ച മലയാളി സൈനികൻ തോമസ് ചെറിയാന് അന്ത്യാഞ്ജലി അർപ്പിച്ച് ജന്മനാട്. വിലാപയാത്രയായി രാവിലെ സഹോദരന്റെ വീട്ടിൽ എത്തിച്ച ഭൗതികശരീരത്തിൽ അന്ത്യാ‍ഞ്ജലി അർപ്പിക്കാൻ ആയിരങ്ങളാണ് ഇലന്തൂരിലെ വീട്ടിലേക്കെത്തിയത്.

ഹിമാചൽ പ്ര​ദേശിൽ 56 വർഷം മുമ്പുണ്ടായ വിമാനാപകടത്തിൽ വീരമൃത്യു വരിച്ച പത്തനംതിട്ട സ്വദേശി തോമസ് ചെറിയാന്റെ സംസ്കാരചടങ്ങുകൾക്ക് ജന്മനാടായ ഇലന്തൂർ സാക്ഷ്യം വഹിച്ചു. തിരുവനന്തപുരം പാങ്ങോട് സൈനിക ക്യാമ്പിലെ മോർച്ചറിയിൽ സൂക്ഷിച്ചിരിക്കുന്ന ഭൗതികശരീരം രാവിലെ 10.30 ഓടെ സൈനിക അകമ്പടിയോടെയാണ് ഇലന്തൂരിലെ തോമസ് ചെറിയാന്റെ കുടുംബ വീട്ടിലെത്തിച്ചത്.

വീട്ടിലെ ചടങ്ങുകൾക്കും പൊതുദർശനത്തിനും ശേഷം ഭൗതികശരീരം വിലാപയാത്രയായി ഇലന്തൂർ കാരൂർ സെന്‍റ് പീറ്റേഴ്‌സ്‌ പള്ളിയിലെത്തിച്ചു. പള്ളിയിലും ധീര സൈനികന് അന്തിമോപചാരം അർപ്പിക്കാൻ നിരവധി ആളുകളെത്തി. തുടർന്ന് ഗാർഡ് ഓഫ് ഓണർ നൽകി. 56 വർഷങ്ങൾക്ക് ശേഷം ജന്മനാട്ടിൽ തോമസ് ചെറിയാന് അന്ത്യവിശ്രമം.