Thrissur Pooram: ആംബുലൻസ് ഉപയോഗിക്കേണ്ടത് ചികിത്സാ ആവശ്യങ്ങൾക്ക്; സുരേഷ് ഗോപിക്കെതിരെ പരാതി

പൂരം അലങ്കോലമാക്കിയെന്ന വിവാദം നിലനിൽക്കെ തൃശ്ശൂർ എംപിയും കേന്ദ്ര സഹമന്ത്രിയുമായ സുരേഷ് ​ഗോപിക്കെതിരെ പരാതി. പൂരപ്പറമ്പിൽ ആംബുലൻസിൽ എത്തിയതിനെച്ചൊല്ലി അഭിഭാഷകനായ കെ. സന്തോഷ് കുമാറാണ് പരാതി നൽകിയത്. 

ചികിത്സാ ആവശ്യങ്ങൾക്ക് ഉപയോ​ഗിക്കേണ്ട ആംബുലൻസ് മറ്റ് ആവശ്യത്തിന് ഉപയോ​ഗിച്ചെന്ന് ചൂണ്ടിക്കാട്ടി മുഖ്യമന്ത്രിക്കും ​ഗതാ​ഗതമന്ത്രിക്കും ട്രാൻസ്പോർട്ട് കമ്മീഷണർക്കുമാണ് പരാതി നൽകിയത്.

ചടങ്ങുകൾ അലങ്കോലമായതിന്റെ പേരിൽ തിരുവമ്പാടി വിഭാ​ഗം പൂരം നിർത്തിവച്ചതിന് പിന്നാലെ പ്രശ്നപരിഹാരത്തിന് സുരേഷ് ​ഗോപി സേവാഭാരതിയുടെ ആംബുലൻസിലാണ് വന്നിറങ്ങിയത്. മറ്റ് വാഹനങ്ങൾക്ക് പ്രവേശനമില്ലാതെ അടച്ചിട്ട മേഖലയിലേക്ക് സുരേഷ് ​ഗോപി ആംബുലൻസിൽ എത്തിയതിന്  പിന്നിൽ ​ഗൂഢാലോചന ഉണ്ടെന്ന് എൽഡിഎഫും യുഡിഎഫും ആരോപണം ഉന്നയിച്ചിരുന്നു. എന്നാൽ ആരോ​ഗ്യ പ്രശ്നം കാരണമാണ് ആംബുലൻസ് ഉപയോ​ഗിച്ചതെന്നാണ് ബിജെപി നോതക്കളുടെ വാദം.

പൂരന​ഗരിയിൽ തിരുവമ്പാടി ദേവസ്വം പ്രതിനിധികളുമായി ചർച്ച നടത്താൻ ആദ്യമെത്തിയ നേതാക്കളിലൊരാൾ സുരേഷ് ​ഗോപിയായിരുന്നു. പൂരം നിലച്ചയുടനെ സുരേഷ് ​ഗോപിയെ ആംബുലൻസിൽ എത്തിച്ചത് ദുരൂഹമാണെന്ന് എൽഡിഎഫ് സ്ഥാനാർത്ഥിയായിരുന്ന വി.എസ് സുനിൽ കുമാർ ആരോപിച്ചിരുന്നു. 

റോഡിൽ മുൻ​ഗണനയും നിയമത്തിൽ ഇളവും ലഭിക്കുന്ന വാഹനമാണ് ആംബുലൻസ്. മോട്ടോർവെഹിക്കിൾ ഡ്രൈവിങ്ങ് റെ​ഗുലേഷൻ-2017 പ്രകാരം ഏതെല്ലാം കാര്യങ്ങൾക്കാണ് മുൻ​ഗണനെയന്ന് വ്യക്തമാക്കിയിട്ടുണ്ട്.

മനുഷ്യജീവൻ രക്ഷിക്കുന്നതിനോ, ആരോഗ്യത്തിന് ഗുരുതരമായ ഹാനി സംഭവിക്കുന്നത് തടയുന്നതിനോ, തീ കെടുത്തുന്നതിനോ ആവശ്യമായ സേവനം നടത്തുന്ന വാഹനങ്ങൾക്കാണ് മുൻഗണന നൽകേണ്ടത്. സൈറൺ ഉപയോഗിച്ചോ ഫ്‌ളാഷ് ലൈറ്റുകൾ തെളിച്ചോ വരുന്ന വാഹനങ്ങൾക്കു മാത്രമേ ഇതിന് അർഹതയുള്ളൂ. ഇത്തരം അവസ്ഥകളിൽ, വേഗപരിധി ലംഘിക്കുന്നതിനും, ചുവപ്പ് സിഗ്നലുകൾ മറികടക്കുന്നതിനും, റോഡിന്റെ ഷോൾഡറിലൂടെയോ എതിർദിശയിലൂടെയോ വാഹനം ഓടിക്കാനും നിയമപരമായി അനുമതി നൽകിയിട്ടുണ്ട്.