Munnar: മൂന്നാറിൽ കൈയ്യേറ്റ ഭൂമികൾ തിരിച്ചുപിടിച്ച് ദൗത്യസംഘം; ഇന്ന് 14 കൈയ്യേറ്റങ്ങൾ ഒഴിപ്പിച്ചു

ഇടുക്കി: മൂന്നാറിൽ കൈയ്യേറ്റ ഭൂമികൾ തിരിച്ചുപിടിച്ച് ദൗത്യസംഘം. ഇന്ന് 14 കയ്യേറ്റങ്ങൾ ഇന്ന് ഒഴിപ്പിച്ചു. വൻകിട - ചെറുകിട വ്യത്യാസമില്ലാതെ കൈയ്യേറ്റം ഒഴിപ്പിക്കൽ നടപടികളുമായി മുന്നോട്ടു പോകുമെന്ന് ദൗത്യസംഘം തലവൻ അരുൺ നായർ വ്യക്തമാക്കി. കർഷക ഭൂമി ഒഴിപ്പിക്കുന്നതിനെതിരെ സിങ്കുകണ്ടത്തെ കർഷക പ്രതിഷേധം തുടരുകയാണ്.  

മൂന്നാർ ദൗത്യത്തിന്റെ ഭാഗമായി ചിന്നക്കനാൽ സിങ്കുകണ്ടത്തെ 12 ഓളം കർഷകരുടെ ഭൂമിയാണ് ആദ്യം കോടതി ഉത്തരവിന്റെ അടിസ്ഥാനത്തിൽ ഏറ്റെടുത്തത്. ഇതിന് ശേഷം സൂര്യനെല്ലിയിൽ 20 ബാർ ഒന്നിൽപ്പെട്ട രണ്ട് പേരുടെ കൈവശം ഇരുന്ന 33 സെന്റ് സ്‌ഥലവും ഒരു കെട്ടിടവുമാണ്  ഏറ്റെടുത്തത്. ഹോം സ്റ്റേ നടത്തി വരികയായിരുന്ന മൂന്നു മുറികൾ സീൽ ചെയ്ത് ബോർഡ് സ്ഥാപിച്ചു. 

മൗണ്ട്ഫോർട്ട് സ്കൂളിൻ്റെ സമീപത്ത് സ്വകാര്യ വ്യക്തികൾ കൈവശം വെച്ച 34 ബാർ ഒന്നിൽപ്പെട്ട അഞ്ചേക്കർ സ്ഥലവും ദൗത്യസംഘം ഒഴിപ്പിച്ചു. ഈ സ്ഥലം കൈവശം വെച്ചിരുന്നത് ഷാർലറ്റ് ജോൺസൺ, നാദിയ ജോൺസൺ എന്നിവരാണ്. മൂന്നിടങ്ങളിലായി ഒഴിപ്പിച്ചത് ഇരുപത്തിമൂന്നേക്കറോളം ഭൂമിയാണ്. അതേസമയം, കോടതി നിർദ്ദേശം നിലനിൽക്കുന്നതിനാൽ താമസമുള്ള വീടുകളിൽ നിന്ന് ഒഴിഞ്ഞുപോകാൻ നിർദ്ദേശം നൽകിയിട്ടില്ല.