Wayanad: ആദിവാസി സ്ത്രീയുടെ മൃതദേഹം ഓട്ടോയിൽ കൊണ്ടുപോയ സംഭവം; വയനാട്ടിൽ ട്രൈബല്‍ പ്രമോട്ടറെ പിരിച്ചുവിട്ടു, പ്രതിഷേധം

വയനാട്: വയനാട്ടിൽ ആംബുലൻസ് ഇല്ലാത്തതിൽ ട്രൈബൽ പ്രമോട്ടറെ ബലിയാടാക്കി അധികൃതർ. മാനന്തവാടിയിൽ ആദിവാസി വയോധികയുടെ മൃതദേഹം ഓട്ടോറിക്ഷയിൽ കൊണ്ടുപോയ സംഭവത്തിന് പിന്നാലെ ട്രൈബൽ പ്രമോട്ടറെ പിരിച്ചുവിട്ട് ഉത്തരവിറങ്ങി. എടവക പഞ്ചായത്തിലെ കുട്ടിക്കുറി കോളനിയിലെ മഹേഷ് കുമാറിനെയാണ് പിരിച്ചുവിട്ടത്. മാനന്തവാടി ട്രൈബൽ ഡെവലപ്മെൻറ് ഓഫീസറുടെതാണ് നടപടി. 

അതേസമയം മഹേഷിനെ പിരിച്ചുവിട്ട നടപടിയിൽ പ്രതിഷേധവുമായി എസ്ടി പ്രമോട്ടർമാർ രം​ഗത്തെത്തി. 'ആംബുലൻസ് എത്തിക്കാൻ പഞ്ചായത്ത് ഭരണസമിതിക്കും ഉത്തരവാദിത്വം ഉണ്ടായിരുന്നുവെന്നും മഹേഷിനെ തിരിച്ചെടുക്കും വരെ സമരം തുടരുമെന്നും പ്രമോട്ടർമാർ വ്യക്തമാക്കി. 

മാനന്തവാടിയിൽ ട്രൈബൽ വകുപ്പിനുള്ളത് രണ്ട് ആംബുലൻസുകൾ മാത്രമാണ്. ഇവ രണ്ടും കോഴിക്കോട് മെഡിക്കൽ കോളേജിലേക്ക് പോകുന്നതിനാൽ ആദിവാസി വിഭാഗക്കാർക്ക് ആംബുലൻസ് ലഭ്യമാകാറില്ല. ഇതിന് മുൻപും ഇത്തരത്തിലുള്ള സംഭവങ്ങൾ ഉണ്ടായിട്ടുണ്ട്. പട്ടികജാതി പട്ടികവർഗ്ഗ വകുപ്പ് മന്ത്രി ഒ ആർ കേളുവിന്റെ മണ്ഡലത്തിലാണ് ദുരവസ്ഥ.