Union Minister Suresh Gopi: കാലിന് പ്രശ്നമായിരുന്നു, ​ആംബുലൻസിൽ കയറ്റിയത് ഒരു രാഷ്ട്രീയവുമില്ലാത്തവർ; വിശദീകരണവുമായി സുരേഷ് ​ഗോപി

തിരുവനന്തപുരം: തൃശ്ശൂര്‍ പൂര നഗരിയിലെത്തിയത് ആംബുലന്‍സിലാണെന്ന് സമ്മതിച്ച് കേന്ദ്ര സഹമന്ത്രി സുരേഷ് ഗോപി. കാലിന് വയ്യായിരുന്നുവെന്നും ആള്‍ക്കൂട്ടത്തിനിടയിലൂടെ നടന്ന് പോകാനുമാകുമായിരുന്നില്ലെന്നും അദ്ദേഹം പറ‍ഞ്ഞു. 5 കിലോമീറ്റര്‍ കാറിൽ സഞ്ചരിച്ചാണ് സ്ഥലത്ത് എത്തിയത്. കാറിൽ വന്നിറങ്ങിയതിന് ശേഷം ഗുണ്ടകള്‍ കാര്‍ ആക്രമിച്ചു. ഒരു രാഷ്ട്രീയവുമില്ലാത്ത ചെറുപ്പക്കാരാണ് തന്നെ അവിടെ നിന്ന് രക്ഷപ്പെടുത്തിയത്. അവരാണ് പിന്നീട് തന്നെ പൊക്കിയെടുത്ത് ആംബുലൻസിൽ കയറ്റിയത്. സിബിഐയെ വിളിക്കാൻ ചങ്കൂറ്റമുണ്ടോയെന്നും സുരേഷ് ഗോപി ചോദിച്ചു.

പൂരം കലക്കൽ വിവാദത്തിൽ എന്ത് വേണമെങ്കിലും ചെയ്യട്ടെയെന്ന് സുരേഷ് ​ഗോപി പറഞ്ഞു. തൃശൂരിലെ ജനങ്ങൾ വോട്ട് ചെയ്തതിന് പ്രധാന കാരണം കരുവന്നൂർ വിഷയമാണ്. കരുവന്നൂർ വിഷയം മറയ്ക്കാൻ പൂരമല്ല എന്തു വേണമെങ്കിലും കാണിക്കുമെന്നും സുരേഷ് ​ഗോപി പറഞ്ഞു. ആംബുലൻസിൽ വന്നിറങ്ങി എന്ന് പറഞ്ഞ ആളുടെ മൊഴി എടുത്തിട്ടുണ്ടല്ലോ. ആ മൊഴിയിൽ എന്ത് കൊണ്ടാണ് പൊലീസ് കേസ് എടുക്കാത്തതെന്നും സുരേഷ് ​ഗോപി മാധ്യമങ്ങളോട് പ്രതികരിച്ചു. ആരുടേയും അച്ഛന് വിളിച്ചിട്ടില്ല. വിളിക്കാൻ ഉദ്ദേശിക്കുന്നുമില്ല.