Vijayadashmi 2023 : അക്ഷര ലോകത്തേക്ക് ശിശുക്ഷേമ സമിതിയിലെ കുരുന്നുകളും

തിരുവനന്തപുരം : വിജയദശമി ദിനത്തിൽ അനാഥത്വത്തിൽ നിന്നും അക്ഷരങ്ങളുടെ ലോകത്തേക്ക് പിച്ച വച്ച് ശിശുക്ഷേമ സമിതിയിലെ കുരുന്നുകളും. വിദ്യാരംഭ ദിനമായ ഇന്ന് ചിരിയും കരച്ചിലുമായി ഒൻപതു കുരുന്നുകളാണ് രാജ്യസഭാംഗം എ.എ. റഹീമിൻറെയും  വനിതാ ശിശുവികസന വകുപ്പ് ഡയറക്ടർ ഹരിത വി. കുമാറിൻറെയും കൈപിടിച്ച് അരിനിറച്ച മുറത്തിൽ ആദ്യക്ഷരങ്ങൾ നുകർന്നത്. പലരേയും അമ്മമാരുടെ കൈയിൽ നിന്നും ഗുരുക്കൻമാരുടെ മടിയിലേക്ക് എത്തിക്കാൻ നന്നേ പാടു പെട്ടു. ചിണുങ്ങലും പിന്നെ കൂട്ടക്കരച്ചിലുമായി.

പിതൃവാത്സല്യത്തോടെ വാരി പുണർന്നാണ് സംസ്ഥാന ശിശുക്ഷേമ സമിതി ജനറൽ സെക്രട്ടറി ജി.എൽ. അരുൺഗോപി കുട്ടികളെ എഴുത്ത് പകരാൻ അതിഥികളുടെ മുൻപിൽ എത്തിച്ചത്. ഒപ്പം എം.പി.യുടേയും ഹരിത വി. കുമാറിൻറേയും വാത്സല്യം നിറഞ്ഞ മുത്തവും. ട്രഷറർ കെ. ജയപാലും ദത്തെടുക്കൽ കേന്ദ്രത്തിലെ പോറ്റമ്മമാരും ചേട്ടന്മാരും ചേച്ചിമാരും ജീവനക്കാരും ചേർന്ന് പായസവും കടലയും മിഠായിയുമൊക്കെ കുരുന്നുകൾക്ക് നൽകിയാണ് വിജയദശമി ദിനം ആഘോഷിച്ചത്.

അതുൽകൃഷ്ണ, അവനിക, നന്മ, മയൂഖ, റിയോശിഹ, വിശ്വ, ശിവാനി, സച്ചിൻ,      ഡിഗോ മറഡോണ എന്നിവരാണ് ഇന്നലെ കലുപിലാ അക്ഷരലോകത്തേക്ക് എത്തിയത്. എല്ലാപേരും മൂന്നു വയസ്സിനു താഴെയുള്ളവർ. അമ്മത്തൊട്ടിൽ വഴിയും മറ്റു പല കാരണങ്ങളാലുമാണ് ജില്ലാ ചൈൽഡ് വെൽഫെയർ കമ്മിറ്റികൾ മുഖേന സമിതിയുടെ കീഴിൽ കുട്ടികൾ എത്തുന്നത്. തിരുവനന്തപുരത്ത് ആറ് വയസിന് മുകളിലുള്ള പെൺകുട്ടികളെ പാർപ്പിക്കുന്നത് അദീപ് ആൻഡ് ഷഫീന ഫൌണ്ടേഷൻ സൌജന്യമായി  നിർമ്മിച്ചു നൽകി ഇക്കഴിഞ്ഞ ജനുവരിയി മുഖ്യമന്ത്രി പിണറായി വിജയൻ ഉദ്ഘാടനം ചെയ്ത വീട് –ബാലികാ മന്ദിരത്തിലാണ്.