Viral News : ഗുരുവായൂര്‍ ക്ഷേത്രനടയില്‍ മുർഖനെ തോളിലിട്ട് കൊല്ലം സ്വദേശിയുടെ സാഹസം; അവസാനം പാമ്പിന്റെ കടിയേറ്റു

തൃശൂർ : ഗുരുവായൂര്‍ ക്ഷേത്രനടയില്‍ വെച്ച് മുർഖൻ പാമ്പിനെ തോളിലിട്ട് സാഹസം കാണിച്ചയാൾക്ക് പാമ്പിന്റെ കടിയേറ്റു. കൊല്ലം പാരിപ്പള്ളി സ്വദേശി സുനിൽ കുമാറിനാണ് പാമ്പ് കടിയേറ്റത്. ഇന്ന് ചൊവ്വാഴ്ച പുലർച്ചെ ഒരു മണിയോടെയാണ് സംഭവം നടക്കുന്നത്. ക്ഷേത്രത്തിന്റെ വടക്കേ നടയിലെ ഗേറ്റിന് സമീപത്തെ സുരക്ഷ ജീവനക്കാരുടെ ക്യാബിന് സമീപം തിങ്കളാഴ്ച രാത്രി 11 മണിയോടെ പാമ്പിനെ കണ്ടെത്തിയിരുന്നു. ഇതിനെ പിന്നീട് സുരക്ഷ ജീവനക്കാരും പോലീസും ചേർന്ന് ക്ഷേത്രത്തിന്റെ സമീപത്ത് നിന്നും ഓടിച്ചു വിട്ടു.

എന്നാൽ കുറച്ച് നേരത്തിന് ശേഷം ഈ പാമ്പിനെ പിടികൂടി അനിൽ കുമാർ ക്ഷേത്രനടയിലേക്കെത്തുകയായിരുന്നു. പോലീസും സെക്യൂരിറ്റി ജീവനക്കാരും ചേര്‍ന്ന് പാമ്പിനെ ഒഴിവാക്കാന്‍ ആവശ്യപ്പെട്ടെങ്കിലും ഇയാള്‍ അതിന് തയ്യാറായില്ല. തുടർന്ന് പാമ്പിന് തോളിലിട്ട് സാഹസം കാണിക്കുകയായിരുന്നു ഇയാൾ. ഏകദേശം അരണിക്കൂർ നേരെ ഇയാൾ പാമ്പുമായി ക്ഷേത്ര നടയ്ക്ക് സമീപം സാഹസം കാട്ടുന്നത് തുടർന്ന്. അതിനുശേഷമാണ് ഇയാൾക്ക് കൈയ്യിലിരിക്കുന്ന പാമ്പിൽ നിന്നും കടിയേൽക്കുന്നത്.

കടിയേറ്റ ഉടനെ അനിൽകുമാർ മൂർഖനെ വലിച്ചെറിഞ്ഞു. പാമ്പ് ഇഴഞ്ഞ് വീണ്ടും സുരക്ഷ ജീവനക്കാരുടെ ക്യാബിന്റരികിലേക്കെത്തി. പാമ്പിന്റെ കടിയേറ്റ അനിൽകുമാർ ഉടൻ തന്നെ കുഴഞ്ഞുവീഴുകയും ചെയ്തു. തുടർന്ന് അനില്‍കുമാറിനെ ദേവസ്വം ജീവനക്കാരും ഭക്തരും ചേര്‍ന്ന് ദേവസ്വം മെഡിക്കല്‍ സെന്ററില്‍ എത്തിച്ചു. പ്രാഥമിക ശുശ്രൂഷ നൽകിയതിന് ശേഷം ഇയാളെ തൃശൂർ മെഡിക്കൽ കോളേജിലേക്ക് മാറ്റി.

രാവിലെ ആറ് മണിയോടെയാണ് ആർആർടി സംഘമെത്തി പ്രദേശത്ത് നിന്നും പാമ്പിനെ പിടികൂടി. ആറടിയോളം നീളമുള്ള മൂര്‍ഖനെയാണ് പിടികൂടിയത്. പാമ്പിനെ പിന്നീട് എരുമപ്പെട്ടി ഫോറസ്റ്റിന് കൈമാറി.