Wayanad Landslide: മരണം 291, 206 പേരെ കാണാനില്ല; ഇന്ന് 40 ടീമുകൾ 6 സെക്ടറുകളായി തിരച്ചിൽ നടത്തും

കൽപ്പറ്റ: വയനാട്ടിലെ ഉരുൾപൊട്ടൽ ദുരന്തത്തിൽ ഇതുവരെ മരിച്ചത് 291 പേർ. 206 പേരെ ഇനിയും കണ്ടെത്താനുണ്ടെന്നാണ് റിപ്പോർട്ട്. 9 ക്യാമ്പുകളിലായി 2328 പേർ കഴിയുകയാണ്. 

ഇന്നലെ നടത്തിയ തിരച്ചിലിൽ 40 മൃതദേഹങ്ങൾ കണ്ടെത്തിയിരുന്നു. ഇന്നും ദുരന്ത മേഖലയിൽ തിരച്ചിൽ നടത്തുകയാണ്. 40 ടീമുകളായി ആറ് സോണുകളായി തിരിച്ചാണ് ഇന്ന് പരിശോധന നടക്കുന്നത്. ഇതിനായി ബെയ്‍ലി പാലത്തിലൂടെ യന്ത്രങ്ങളും ആംബുലൻസുകളും എത്തിക്കും. ചാലിയാർ പുഴയുടെ 40 കിലോമീറ്റർ പരിധിയിലും തിരച്ചിൽ നടക്കുമെന്നാണ് റിപ്പോർട്ട്. ഓരോ സോണിലും നടക്കുന്ന തിരച്ചിൽ സംഘത്തിൽ വനജീവനക്കാരും നാട്ടുകാരും ഉണ്ടാകും.

ഇന്നത്തെ തിരച്ചിൽ കൂടുതൽ ആസൂത്രിതമായാണ് നടക്കുന്നത്. ആദ്യത്തെ സോൺ അട്ടമലയും ആറൻമലയും ചേർന്നതാണ്. മുണ്ടക്കൈ രണ്ടാമത്തെ സോണും പുഞ്ചിരിമട്ടം മൂന്നാമത്തെ സോണും ആണ്. വെള്ളാർമല വില്ലേജ് റോഡ് നാലാമത്തേതും ജിവിഎച്ച്എസ്എസ് വെള്ളാർമല അഞ്ചാമത്തെ സോണുമാണ്.  അതുപോലെ പുഴയുടെ അടിവാരം ആറാമത്തെ സോണുമാണ്. സൈന്യം, എൻഡിആർഎഫ്, ഡിഎസ്‌ജി, കോസ്റ്റ് ഗാർഡ്, നേവി, തുടങ്ങിയ വിഭാഗങ്ങള്‍ സംയുക്തമായാണ് തെരച്ചിൽ നടത്തുക. 

ഓരോ ടീമിലും മൂന്നു നാട്ടുകാരും ഒരു വനം വകുപ്പ് ജീവനക്കാരനും ഉണ്ടാവും. ഇതുകൂടാതെ, ചാലിയാർ പുഴയുടെ നാല്പത് കിലോമീറ്ററിൽ പരിധിയിലെ പോലീസ് സ്റ്റേഷൻ അതിർത്തികളിലും തിരച്ചിൽ തുടരും. ചാലിയാർ പുഴയിൽ പോലീസ് ഹെലികോപ്ടർ ഉപയോഗിച്ച് ചാലിയറിൽ തിരച്ചിൽ നടത്തും ഒപ്പം പോലീസിൻ്റെ ഡ്രോൺ സംവിധാനം ഉപയോഗിച്ചും തിരച്ചിൽ നടത്തും.