Wayanad Landslides: രക്ഷാപ്രവർത്തനങ്ങൾക്ക് കൈത്താങ്ങ്; മൂന്ന് ദിവസത്തേക്ക് വയനാട്ടിൽ സൗജന്യ പാക്കേജ് പ്രഖ്യാപിച്ച് എയർടെൽ

കല്‍പ്പറ്റ: വയനാട് മുണ്ടക്കൈയിലെ ഉരുള്‍പ്പൊട്ടലിന്റെ പശ്ചാത്തലത്തില്‍ രക്ഷാപ്രവര്‍ത്തനങ്ങള്‍ക്ക് സഹായമായി എയര്‍ടെല്‍ രംഗത്ത്.  ഇതിനായി വയനാട്ടില്‍ മൂന്ന് ദിവസത്തേക്ക് ഇന്റര്‍നെറ്റ്, എസ്എംഎസ്, ടോക്ക് ടൈം എന്നിവ സൗജന്യമായിരിക്കുമെന്ന് അധികൃതര്‍ അറിയിച്ചിരിക്കുകയാണ്.

ഈ ഓഫർ ഏതെങ്കിലും പാക്കേജ് വാലിഡിറ്റി കഴിഞ്ഞവര്‍ക്ക് അടക്കം ബാധകമാണ്. ഒപ്പം പ്രീപെയ്ഡ്, പോസ്റ്റ് പെയ്ഡ് കസ്റ്റമേഴ്‌സിനും ഇളവുകള്‍ പ്രഖ്യാപിച്ചിട്ടുണ്ട്. പോസ്റ്റ് പെയ്ഡ് ബില്‍ അടക്കാന്‍ താമസിക്കുന്നവർക്കും ഇളവ് നല്‍കിയിട്ടുണ്ട്.ഇതിനുപുറമേ കേരളത്തിലെ 52 റീട്ടെയില്‍ സ്റ്റോറുകളില്‍ കളക്ഷന്‍ സെന്ററുകളും ആരംഭിച്ചു. ഇവിടെ സഹായ സന്നദ്ധരായവര്‍ക്ക് ദുരിതബാധിതര്‍ക്ക് ആവശ്യമായ വസ്തുക്കള്‍ എത്തിക്കാന്‍ സാധിക്കുമെന്നും ഇവ തദ്ദേശ സ്ഥാപനങ്ങളെ ഏല്‍പ്പിക്കുമെന്നും കമ്പനി വ്യക്തമാക്കി.

വയനാട് ഉരുള്‍പൊട്ടലില്‍ മരണം 276 ആയിട്ടുണ്ട്.  ഇരുന്നൂറ്റി നാല്‍പ്പതിലേറെ പേരെ കാണാനില്ലെന്നും റിപ്പോർട്ടുണ്ട്. മരണസംഖ്യ ഇനിയും ഉയരുമെന്നാണ് റിപ്പോർട്ട്. ചെളിനിറഞ്ഞ വീടുകളില്‍ ഇനിയും ആളുകള്‍ കുടുങ്ങിക്കിടക്കുന്നുണ്ടെന്ന സംശയമുണ്ട്. മൂന്നാം ദിനമായ ഇന്ന് രാവിലെ തന്നെ തിരച്ചിൽ ആരംഭിച്ചിട്ടുണ്ട്.