Wild Elephant : കട്ടപ്പ പന മറിച്ചിട്ട് അതിരപ്പിള്ളിയിൽ റോഡ് തടഞ്ഞു! വിനോദസഞ്ചാരികളും പ്രദേശവാസികളും കുടുങ്ങി

തൃശൂർ : അതിരപ്പിള്ളി ഏഴാറ്റുമുഖം ചെക്ക്പോസ്റ്റിന് സമീപം വഴി തടഞ്ഞ് കട്ടപ്പ എന്ന വിളിക്കുന്ന കാട്ടാന. എണ്ണപ്പന റോഡിലേക്ക് കുത്തി മറിച്ചിട്ട് ഒന്നര മണിക്കൂറിൽ അധികം നേരം ആന വഴിയിൽ നിലയുറപ്പിക്കുകയായിരുന്നു. ഇതോടെ റോഡിൽ വിനോദ സഞ്ചാരികളും പ്രദേശവാസികളും കുടുങ്ങി. ഒന്നര മണിക്കൂർ നേരം ഇതുവഴിയുള്ള ഗതാഗതം പൂർണ്ണമായി തടസ്സപ്പെട്ടു.

ഇന്ന് ഡിസംബർ 17 ഞായറാഴ്ച രാവിലെ ആറ് മണിയോടെയാണ് കാട്ടാന റോഡിൽ പനയും മറിച്ചിട്ട് നിലയുറപ്പിച്ചത്. അവധി ദിവസമായതിനാല്‍ അതിരപ്പിള്ളി മേഖലയിലേക്ക് പോകാനായി നിരവധി വിനോദ സഞ്ചാരികളാണ് ഈ വഴിക്കെത്തിയത്. ആന റോഡില്‍ നിലയുറപ്പിച്ചതോടെ വിനോദ സഞ്ചാരികള്‍ക്കും പ്രദേശവാസികളും കടന്നുപോകാൻ കഴിയാതെ ഒന്നര മണിക്കൂറോളം ബുദ്ധിമുട്ടി.

ഇതിനിടെ വിനോദ സഞ്ചാരികളെ വിരട്ടിയോടിക്കുന്ന സാഹചര്യവും ഉണ്ടായി. അവശ്യസാധനങ്ങളുമായിട്ടുള്ള വാഹനങ്ങൾ ഉൾപ്പെടെയാണ് വഴിയില്‍ കുടുങ്ങിയത്. കുറച്ചു ദിവസങ്ങളായി ഈ ആന പ്രദേശത്തുള്ളതായിട്ടാണ് നാട്ടുകാര്‍ പറയുന്നത്. ഒടുവില്‍ ആന സ്വമേധയാ കാട് കയറിയതോടെയാണ് ഗതാഗതം പുനഃസ്ഥാപിച്ചത്.