തിരുവനന്തപുരത്ത് പ്രസവശസ്ത്രക്രിയയെ തുടർന്ന് യുവതി മരിച്ചു; ചികിത്സാ പിഴവെന്ന് ബന്ധുക്കൾ

തിരുവനന്തപുരം: അടിമലത്തുറയിൽ സ്വകാര്യശുപത്രിയിൽ പ്രസവശസ്ത്രക്രിയയെ തുടർന്ന് യുവതി മരിച്ചു. ചൊവ്വര സ്വദേശികളായ സുനിൽ, ഷീല ദമ്പതികളുടെ മകൾ ശില്പ ആണ് മരിച്ചത്. ചികിത്സാ പിഴവാണ് മരണകാരണമെന്ന് യുവതിയുടെ ബന്ധുക്കൾ ആരോപിച്ചു.

കോട്ടുകാൽ ചപ്പാത്തിന് സമീപത്തെ മരിയനിലയം ആശുപത്രിയിലാണ് സംഭവം. കഴിഞ്ഞ രാത്രി അടിയന്തര ശസ്ത്രക്രിയക്ക് ശില്പയെ വിധേയയാക്കുകയായിരുന്നു. തുടർന്ന് പെൺകുട്ടിക്ക് ജന്മം നൽകിയെങ്കിലും ശില്പയുടെ ജീവൻ രക്ഷിക്കാൻ കഴിഞ്ഞില്ല. അനസ്തേഷ്യ നൽകുന്നതിന് മുമ്പ് മകളെ കണ്ടിരുന്നതായും ഒരുവിധ ആരോഗ്യ പ്രശ്നങ്ങളും ആശുപത്രിയുടെ ഭാഗത്തുനിന്ന് ഉന്നയിച്ചിരുന്നില്ല എന്നും ശില്പയുടെ അച്ഛൻ പറയുന്നു.

ഒരുവിധ അടിസ്ഥാന സൗകര്യങ്ങളും ഇല്ലാത്ത ആശുപത്രിയാണെന്നും, ചികിത്സാ പിഴവ് സംഭവിച്ചിട്ടുണ്ട് എന്നും ആരോപിച്ച് ശില്പയുടെ ബന്ധുക്കൾ രംഗത്തെത്തി. അതേസമയം സംഭവത്തിൽ പ്രതികരിക്കാൻ ആശുപത്രി അധികൃതർ തയ്യാറായിട്ടില്ല. ഇൻക്വസ്റ്റ് നടപടികൾ പൂർത്തിയാക്കി മൃതദേഹം തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റി. പോസ്റ്റുമോർട്ടത്തിനുശേഷം ബന്ധുക്കൾക്ക് വിട്ടു നൽകും. വിഴിഞ്ഞം പോലീസ് മേൽനടപടി സ്വീകരിച്ചു.