Arundhathi Nair Accident News: നടി അരുന്ധതി നായർ വെന്റിലേറ്ററിൽ, നില ​ഗുരുതരം; സഹായം അഭ്യർത്ഥിച്ച് കുടുംബം

തിരുവനന്തപുരം: ബൈക്കപകടത്തെ തുടർന്ന് ചികിത്സയിൽ കഴിയുന്ന നടി അരുന്ധതി നായരുടെ നില ​ഗുരുതരാവസ്ഥയിൽ. നിലവിൽ അരുന്ധതി വെൻലേറ്ററിന്റെ സഹായത്തോടെയാണ് ജീവൻ നിലനിർത്തുന്നത്. കഴിഞ്ഞ വ്യാഴാഴ്ച്ച കോവളം ബൈപ്പാസിൽ വെച്ചാണ് അരുന്ധതി അപകടത്തിൽ പെടുന്നത്. തലയ്ക്ക് സാരമായ പരിക്കേറ്റ താരത്തെ സ്വകാര്യ ആശുപത്രിയിൽ പ്രവേശിപ്പിച്ചു പിന്നാലെ ആരോ​ഗ്യനില കൂടുതൽ വഷളായതിനെ തുടർന്നാണ് വെന്റിലേറ്ററിലേക്ക് മാറ്റിയത്. അരുന്ധതിയുടെ തലച്ചോറിൽ രക്തം കട്ടപിടിച്ചിട്ടുണ്ട്. വാരിയെല്ലുകൾക്കും ​ഗുരുതരമായ ക്ഷതം സഭവിച്ചിട്ടുണ്ട്.   

നടിയുടെ സഹോദരി ആരതി നായരാണ് സഹായം അഭ്യർത്ഥിച്ച് സുഹൃത്ത് ശരത്ത് ലാൽ പോസ്റ്റ് ചെയ്ത ഇൻസ്റ്റ​ഗ്രാം സറ്റോറി പങ്കുവെച്ചിരിക്കുന്നത്. ദിവസവുമുള്ള ആശുപത്രി ചിലവുകൾ താങ്ങാൻ സാധിക്കുന്നില്ല. തങ്ങളെക്കൊണ്ട് കഴിയുന്ന രീതിയിൽ കാര്യങ്ങൾ തെയ്യുന്നുണ്ട് എങ്കിലും ചെലവുകൾ താങ്ങാവുന്നതിലും അധികമാവുകയാണ്. നിങ്ങളാൽ കഴിയുന്ന തരത്തിൽ സംഭാവനകൾ നൽകി സഹായിക്കണമെന്നും പോസ്റ്റിൽ പറയുന്നു. അരുന്ധതിയുടെ വിവരങ്ങൾ അന്വേഷിക്കുന്നവരോട് നന്ദിയുണ്ടെന്നും എന്നാൽ കൂടുതൽ കാര്യങ്ങൾ പറയാനാകുന്ന സാഹചര്യമല്ലെന്നും വ്യക്തമാക്കിയിട്ടുണ്ട്. 

മലയാളം, തമിഴ് സിനിമകളിലൂടെ പ്രേക്ഷകർക്ക് സുപരരിചിതയായ നടിയാണ് അരുന്ധതി. ഒരു യൂട്യൂബ് ചാനലിന് വേണ്ടിയുള്ള ഷൂട്ടിങ്ങിനായി പോയി സഹോദരനൊപ്പം തിരിച്ചു വരികയായിരുന്നു നടി. രാത്രി പന്ത്രണ്ടോടെയായിരുന്നു അപകടം. ഇടിച്ചിട്ട വാഹനം നിർത്താതെ പോകുകയായിരുന്നു. പരിക്കേറ്റ ഇരുവരും ഒരു മണിക്കൂറോളം റോഡിൽ കിടന്നു. ഒടുവിൽ അതുവഴി പോയ മറ്റു വാഹനയാത്രക്കാരാണ് ഇരുവരേയും ആശുപത്രിയിൽ എത്തിച്ചത്. തമിഴിലൂടെയാണ് അരുന്ധതി സിനിമാരം​ഗത്ത് സജീവമാകുന്നത്. തമിഴിലെ സൂപ്പർ ഹിറ്റ് സിനിമയായ സൈത്താനിലെ നായികയായിരുന്നു. ആദ്യ മലയാള ചിത്രം ഒറ്റയ്ക്കൊരു കാമുകനാണ്.