Ram Gopal Varma: `വ്യൂഹം` പത്മവ്യൂഹമായി! രാം ​ഗോപാൽ വർമ ഒളിവിൽ, ലുക്ക് ഔട്ട് നോട്ടീസ് പുറപ്പെടുവിച്ചു

സംവിധായകൻ രാം​ഗോപാൽ വർമക്കെതിരെ ലുക്ക് ഔട്ട് നോട്ടീസ് പുറപ്പെടുവിച്ച് ആഡ്ര പൊലീസ്. ആഡ്രപ്രദേശ് മുഖ്യമന്ത്രി ചന്ദ്രബാബു നായിഡുവിനെതിരെ അപകീർത്തികരമായ സമൂഹമാധ്യമ പോസ്റ്റുകളിട്ട കേസിലാണ് ലുക്ക് ഔട്ട് നോട്ടീസ് പുറപ്പെടുവിച്ചത്. 

ഒളിവിൽ പോയ സംവിധായകനായി തമിഴ്നാട്ടിലും ആന്ധ്രപ്രദേശിലും തിരച്ചിൽ തുടങ്ങി. ഹൈദരാബാദിലെ വീടിന് മുന്നിൽ പൊലീസ് നിലയുറപ്പിച്ചിട്ടുണ്ട്.

പുതിയ ചിത്രം വ്യൂഹത്തിന്റെ പ്രമോഷന്റെ ഭാ​ഗമായി മുഖ്യമന്ത്രി ചന്ദ്രബാബു നായിഡുവിന്റെയും ഉപമുഖ്യമന്ത്രി പവൻ കല്യാണിന്റെയും മോർഫ് ചെയ്ത ചിത്രങ്ങളടക്കം വർമ പോസ്റ്റ് ചെയ്തെന്ന് ചൂണ്ടിക്കാട്ടി രാമലിം​ഗം എന്നയാളാണ് നൽകിയ പരാതിയിലാണ് പൊലീസ് കേസെടുത്തത്. 

ചോദ്യം ചെയ്യലിന് ഹാജരാക്കാൻ വർമയ്ക്ക് സമൻസ് അയച്ചിരുന്നു. എന്നാൽ അറസ്റ്റ് ഉണ്ടാകുമെന്ന ഭയത്താൽ വർമ ഒളിവിൽ പോവുകയായിരുന്നു. 

അതേസമയം സംവിധായകൻ വെർച്വലായി ചോദ്യം ചെയ്യലിന് ഹാജരാകുമെന്ന് അഭിഭാഷകൻ മുഖേന അറിയിച്ചതായി റിപ്പോർട്ടുകളുണ്ട്. ഐടി ആക്ട് പ്രകാരമാണ് കേസ്.