Murali Gopy: `എമ്പുരാൻ` അണിയറയിൽ, പുതിയ ചിത്രവുമായി മുരളി ഗോപി; ആര്യ നായകനാകുന്ന സിനിമയുടെ പൂജ കഴിഞ്ഞു

മുരളി ഗോപി രചന നിർവ്വഹിച്ച് മോഹൻലാൽ നായകനായി എത്തുന്ന ബി​ഗ് ബജറ്റ് ചിത്രം 'എമ്പുരാൻ' അണിയറയിൽ ഒരുങ്ങുകയാണ്. മുരളി ഗോപിയുടെ രചനയിൽ ഒരുങ്ങിയ ലൂസിഫറിന്റെ വൻ വിജയത്തിന് ശേഷം ഒരുക്കിയ ചിത്രമാണ് 'എമ്പുരാൻ'. ചിത്രം തിയേറ്ററുകളിലെത്താൻ തയ്യാറെടുക്കുന്നതിനിടെ മുരളി ഗോപിയുടെ രചനയിൽ വീണ്ടുമൊരു ചിത്രത്തിന് തുടക്കം കുറിച്ചിരിക്കുകയാണ്.

ജിയെൻ കൃഷ്ണകുമാർ സംവിധാനം ചെയ്യുന്ന സിനിമയുടെ പൂജ തമിഴ്നാട്ടിലെ മംഗളനാഥസ്വാമി ശിവ ക്ഷേത്രത്തിൽ വച്ചാണ് നടത്തിയത്. 3,000 വർഷം പഴക്കമുള്ള തമിഴ്നാട്ടിലെ പ്രമുഖ ക്ഷേത്രങ്ങളിൽ ഒന്നാണ് മംഗളനാഥസ്വാമി ശിവ ക്ഷേത്രം. ആര്യ നായകനാകുന്ന ചിത്രത്തിൽ ശാന്തി ബാലകൃഷ്ണൻ, നിഖില വിമൽ, സരിത കുക്കു, ഇന്ദ്രൻസ്, മുരളി ഗോപി, സിദ്ധിക്ക്, രഞ്ജി പണിക്കർ, ശരത് അപ്പാനി, സാബു തുടങ്ങി നിരവധി താരങ്ങൾ അണിനിരക്കുന്നു.

മലയാളം, തമിഴ്, തെലുങ്ക്, കന്നഡ എന്നീ ഭാഷകളിലെ നിരവധി താരങ്ങളും ചിത്രത്തിൽ അഭിനയിക്കുന്നുണ്ട്. ടിയാൻ എന്ന ബിഗ് ബജറ്റ് സിനിമയ്ക്ക് ശേഷം മുരളി ഗോപിയും ജിയെൻ കൃഷ്ണകുമാറും വീണ്ടും ഒന്നിക്കുന്ന പുതിയ ചിത്രമാണിത്. സൂപ്പർ ഹിറ്റ് തമിഴ് സിനിമ മാർക്ക് ആന്റണിക്ക് ശേഷം മിനി സ്റ്റുഡിയോയുടെ ബാനറിൽ എസ്. വിനോദ് കുമാർ നിർമ്മിക്കുന്ന പതിനാലാമത്തെ ചിത്രമാണിത്. നിലവിൽ പേരിട്ടിട്ടില്ലാത്ത ചിത്രത്തിന്റെ കൂടുതൽ വിവരങ്ങൾ പുറത്ത് വിട്ടിട്ടില്ല. ചിത്രത്തിന്റെ മാർക്കറ്റിംഗ് കൺസൽട്ടന്റ് ബ്രിഗ്‌ഫോർത്ത് അഡ്വെർടൈസിങ് ആണ്.