Bigg Boss Malayalam Season 6: കപ്പുയർത്തി ജിന്റോ; `ഇന്ന് ഞാൻ നാടിന്റെയും വിളക്കായി`

Bigg Boss Malayalam Season 6 Latest Updates: 100 ദിവസങ്ങള്‍ക്കിടയിലെ കടുത്ത മത്സരങ്ങൾക്കൊടുവിൽ ബിഗ് ബോസ് വിജയിയെ പ്രഖ്യാപിച്ചു. പ്രേക്ഷകര്‍ ആകാംക്ഷയോടെ കാത്തിരുന്ന ഫിനാലെയില്‍ കപ്പുയർത്തിയത് ജിന്റോയാണ്. 

നേരത്തെയുണ്ടായിരുന്ന പ്രവചനങ്ങളെ ശരിവയ്ക്കും വിധമായിരുന്നു ഷോയുടെ വിജയിയെ പ്രഖ്യാപിച്ചതും. തികച്ചും നാടകീയ മുഹൂര്‍ത്തങ്ങള്‍ക്കൊടുവിൽ ജിന്റോയുടെ കൈയുയർത്തി ഫിനാലെയിൽ മോഹൻലാല്‍ വിജയിയെ പ്രഖ്യാപിക്കുകയായിരുന്നു.  ബിഗ് ബോസ് മലയാളം സിക്സിന്റെ ഷോയിൽ എത്തുമ്പോൾ സെലിബ്രിറ്റികളുടെ ഫിറ്റ്‍നെസ് ഗുരുവെന്ന വിശേഷണം മാത്രമായിരുന്നു ജിന്റോയ്ക്കുണ്ടായിരുന്നത് അവിടെ നിന്നും  പതിയെപ്പതിയെ ജിന്റോ പ്രേക്ഷകരുടെ പ്രിയങ്കരനായി മാറുകയായിരുന്നു. ഷോയിൽ പലപ്പോഴും മണ്ടനെന്ന് മുദ്രകുത്തപ്പെട്ട ജിന്റോ തന്റെ കഠിനാദ്ധ്വാനത്തിലൂടെ തന്നെയാണ് വിജയ കിരീടം ചൂടിയത് എന്നതിൽ സംശയമില്ല.  

ജിന്റോയെ കൂടാതെ ടോപ് ഫൈവിൽ അര്‍ജുനും ജാസ്‍മിനും അഭിഷേകും ഋഷിയുമാണ് ഉണ്ടായിരുന്നത്. എതിരാളികളെ ബഹുദൂരം പിന്നിലാക്കിയാണ് ജിന്റോ ജേതാവായതെന്നത് ശ്രദ്ധേയം. ഷോയിൽ റണ്ണറപ്പായി തിരഞ്ഞെടുത്തത് അര്ജ്ജുനെയാണ്. ബിഗ് ബോസ് കിരീട നേട്ടത്തിന് ശേഷമുള്ള ജിന്റോയുടെ പ്രതികരണം വൈറലാകുകയാണ്. ജിന്റോ പറഞ്ഞത് വീട്ടില്‍ പ്രതിസന്ധി ഘട്ടങ്ങളുണ്ടാകുമ്പോള്‍ അമ്മ പറയാറുണ്ട് 'മോൻ തളരുത് വീടിന്റെ വിളക്കാണെന്ന് ഇപ്പോള്‍ ഞാൻ നാടിന്റെ വിളക്കായി' എന്നായിരുന്നു. 

നിറഞ്ഞ ചിരിയോടെയായിരുന്നു അര്‍ജുന്റെ പ്രതികരണവും. ശരിക്കും അനുഗ്രഹീതനായിരിക്കുന്നു എന്നാണ് അർജുൻ പറഞ്ഞത്. ഇത് എന്റെ ജീവിതത്തിന്റെ ഒരു തുടക്കം ആയിരിക്കുമെന്നും അർജുൻ പറഞ്ഞു. വിജയിയെ പ്രഖ്യാപിച്ചതോടെ നിരവധി മാറ്റങ്ങളോടെ വന്ന ഇത്തവണത്തെ ബിഗ് ബോസ് ഷോയ്ക്ക് തിരശീല വീണിരിക്കുകയാണ്.