Vikrant Massey: ഇനി വീട്ടുകാർക്കൊപ്പം; കരിയറിന്റെ പീക്ക് ലെവലിൽ അപ്രതീക്ഷിത തീരുമാനവുമായി ട്വൽത്ത് ഫെയ്ൽ താരം

അഭിനയത്തിൽ നിന്ന് വിരമിക്കുന്നുവെന്ന് പ്രഖ്യാപിച്ച് ബോളിവുഡ് നടൻ വിക്രാന്ത് മാസി. ട്വൽത്ത് ഫെയ്ൽ, സെക്ടർ 26, സബർമതി എക്സ്പ്രസ് തുടങ്ങിയ ചിത്രങ്ങളിലെ ​ഗംഭീര പ്രകടനത്തിലൂടെ കൈയടി നേടിയ താരമാണ് വിക്രാന്ത്. 

പ്രേക്ഷക പ്രശംസയും നിരൂപകപ്രശംസയും ഒരുപോലെ പിടിച്ച് പറ്റി കരിയറിന്റെ ഉന്നതിയിൽ നിൽക്കുമ്പോൾ അഭിനയത്തിൽ നിന്ന് വിരമിക്കുന്നുവെന്ന താരത്തിന്റെ പ്രഖ്യാപനം സിനിമാ ലോകത്തെ ഞെട്ടിച്ചിരിക്കുകയാണ്. 

പുതിയ ചിത്രമായ ദി സബർമതി റിപ്പോർട്ട് ബോക്സ് ഓഫീസിൽ വലിയ വിജയം നേടുന്നതിനിടെയാണ് താരത്തിന്റെ അപ്രതീക്ഷിത വിരമിക്കൽ. 2025ൽ വരുന്ന ചിത്രങ്ങളായിരിക്കും അവസാനത്തേത് എന്ന് വിക്രാന്ത് വ്യക്തമാക്കി.

ഭർത്താവ്, പിതാവ്, മകൻ എന്ന നിലയിലുള്ള ഉത്തരവാദിത്വങ്ങൾ നിറവേറ്റാനുണ്ടെന്നും അതിനായി വീട്ടിലേക്ക് മടങ്ങുന്നുവെന്നും നടൻ ഇൻസ്റ്റഗ്രാമിൽ പങ്കുവെച്ച കുറിപ്പിൽ പറഞ്ഞു. 

'കഴിഞ്ഞ കുറച്ച് വർഷങ്ങൾ അസാധാരണമായിരുന്നു. നിങ്ങളോരോരുത്തവരുടെയും പിന്തുണയ്ക്ക് നന്ദി. 

എന്നാൽ ഞാൻ മുന്നോട് പോകുമ്പോൾ ഒരു ഭർത്താവ്, പിതാവ്, മകൻ എന്ന നിലയിൽ വീട്ടിലേക്ക് മടങ്ങാനുള്ള സമയമാണിതെന്ന് മനസ്സിലാക്കുന്നു. ഒപ്പം അഭിനേതാവ് എന്ന നിലയിലും. 2025ൽ നാം അവസാനമായി കാണും. അവസാന രണ്ട് ചിത്രങ്ങളും ഒരുപാട് ഓർമകളുമുണ്ട്. ഒരിക്കൽ കൂടി നന്ദി' ഇൻസ്റ്റഗ്രാമിൽ കുറിച്ചു.

ധൂം മച്ചോവോ ധൂം എന്ന ടെലിവിഷൻ ഷോയിലൂടെയാണ് നടൻ തന്റെ അഭിനയജീവിതം ആരംഭിക്കുന്നത്. ധരം വീർ, ബാലിക വധു തുടങ്ങിയവയിലൂടെ ഹിന്ദി സീരിയൽ മേഖലയിൽ ശ്രദ്ധേയനായി. 2013ൽ രൺവീർ സിങ് - സോനാക്ഷി സിൻഹ എന്നിവർ പ്രധാനവേഷത്തിലെത്തിയ ലൂട്ടേര എന്ന ചിത്രത്തിലൂടെ സിനിമയിൽ അരങ്ങേറ്റം. മിസാപൂർ പരമ്പരയിലെ പ്രകടനം കരിയറിൽ വഴിതിരിവായി. മലയാള ചിത്രം ഫോറൻസികിന്റെ റിമേക്കിലും അഭിനയിച്ചു.