Super Zindagi Movie : ധ്യാൻ ശ്രീനിവാസന്റെ മറ്റൊരു ചിത്രത്തിന്റെ ഫസ്റ്റ്ലുക്ക് പുറത്ത്; സിനിമയുടെ പേര് സൂപ്പർ സിന്ദഗി

ധ്യാൻ ശ്രീനിവാസൻ നായകനായി എത്തുന്ന മറ്റൊരു ചിത്രത്തിന്റെ ഫസ്റ്റ്ലുക്ക് പുറത്ത് വിട്ടു. നവാഗതമായ വിന്റേഷ് സംവിധാനം ചെയ്യുന്ന ചിത്രത്തിന് സൂപ്പർ സിന്ദഗി എന്നാണ് പേരിട്ടിരിക്കുന്നത്. സൂപ്പർ സിന്ദഗി ഇത് നടന്ന കഥ എന്നാണ് സിനിമയുടെ മുഴുവൻ പേര്. ചിത്രത്തിൽ ധ്യാനിനൊപ്പം മുകേഷ്, ജോണി ആന്റണി, സുരേഷ് കൃഷ്ണ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. പാർവതി നായരാണ് സൂപ്പർ സിന്ദഗിയിൽ നായികയായി എത്തുന്നത്.

666 പ്രൊഡക്ഷൻസിന്റെ ബാനറിൽ ഹസീബ് മേപ്പാട്ടും സത്താർ പടന്നിലക്കാട്ടും ചേർന്നാണ് ചിത്രം നിർമിക്കുന്നതേ്. സംവിധായകൻ വിന്റേഷും പ്രജിത്ത് രാജ് ഇകെആറും ചേർന്നാണ് ചിത്രത്തിന്റെ രചന നിർവഹിച്ചിരിക്കുന്നത്. മാസ്റ്റർ മഹേന്ദ്രനും ഹൃദയം ഫെയിം കലേഷും (സെൽവ) ചിത്രത്തിൽ മറ്റ് കഥാപാത്രങ്ങളെ അവതരിപ്പിക്കുന്നണ്ട്.

എൽദോ ഐസക്കാണ് ചിത്രത്തിന്റെ ഛായഗ്രാഹകൻ. സൂരജ് എസ് കുറപ്പാണ് ചിത്രത്തിന് സംഗീത നൽകുക. ലിജോ പോളാണ് സൂപ്പർ സിന്ദഗിയുടെ എഡിറ്റർ. 

അടുത്തിടെ നിരവധി ചിത്രങ്ങളാണ് ധ്യാനിന്റേതായി പ്രഖ്യാപിച്ചിരിക്കുന്നത്. കഴിഞ്ഞ ദിവസം രണ്ട് ചിത്രങ്ങളാണ് പ്രഖ്യാപിച്ചിട്ടുള്ളത്. ഒന്ന് നിവിൻ പോളിക്കൊപ്പം എത്തുന്ന ചിത്രം ജനഗണമനയുടെ സംവിധായകൻ ഡിജോ ജോസ് ആന്റണിയാണ് ഒരുക്കുന്നത്. ഇതിന് പുറമെ ബോബൻ സാമുവേൽ ഒരുക്കുന്ന മാച്ചാന്റെ മാലഖ്, ദിലീപിനൊപ്പം ഭ.ഭ.ബ എന്നീ ചിത്രങ്ങളാണ് പ്രഖ്യാപിച്ചിരിക്കുന്നത്. കൂടാതെ ഹൃദയത്തിന് ശേഷം വിനീത് ശ്രീനിവാസൻ ഒരുക്കുന്ന വർഷങ്ങൾക്ക് ശേഷം എന്ന സിനിമയിലും ധ്യാൻ ശ്രീനിവാസൻ പ്രധാന വേഷത്തിലെത്തുന്നുണ്ട്.