Fahadh Faasil: സൂപ്പർ സ്റ്റാറിനും ബി​ഗ് ബിയ്ക്കും ഒപ്പം ഫഹദ്; ലൈക്ക പ്രൊഡക്ഷൻസ് പങ്കിട്ട ചിത്രം വൈറൽ

മലയാളത്തിന്റെ പ്രിയ താരം ഫഹദ് ഫാസിന്റെ പിറന്നാൾ ആണ് ഇന്ന്. നിരവധി പ്രോജക്ടുകൾ താരത്തിന്റേതായി റിലീസിന് തയാറെടുക്കുന്നുണ്ട്. മലയാളത്തിനൊപ്പം തമിഴ്, തെലുങ്ക് ചിത്രങ്ങളുെ ഫഹദിന്റേതായി അണിയറയിൽ ഒരുങ്ങുന്നുണ്ട്. രജനികാന്ത് കേന്ദ്ര കഥാപാത്രമാകുന്ന വേട്ടൈയൻ എന്ന ചിത്രത്തിലും ഫഹദ് പ്രധാന കഥാപാത്രത്തെ അവതരിപ്പിക്കുന്നുണ്ട്. താരത്തിന്റെ പിറന്നാൾ ദിനത്തിൽ വേട്ടൈയൻ നിർമ്മാതാക്കളായ ലൈക്ക പ്രൊഡക്ഷൻസ് ആശംസകൾ നേർന്നിട്ടുണ്ട്. 

രജനികാന്തിനും അമിതാഭ് ബച്ചനും ഒപ്പം ഫഹദ് നിൽക്കുന്ന ചിത്രമാണ് ലൈക്ക പ്രൊഡക്ഷൻസ് സോഷ്യൽ മീഡിയയിൽ പങ്കുവെച്ചിരിക്കുന്നത്. ഇരുവരുടെയും നടുവിൽ ഫഹദ് നിൽക്കുന്നതാണ് ചിത്രം. ഈ ചിത്രം സോഷ്യൽ മീഡിയയിൽ വൈറലായി കഴിഞ്ഞു. 

രജനികാന്തിനെ നായകനാക്കി ടിജെ ജ്ഞാനവേൽ സംവിധാനം ചെയ്യുന്ന ചിത്രമാണ് വേട്ടൈയൻ. ജയ് ഭീം എന്ന ഹിറ്റ് ചിത്രത്തിന്റെ സംവിധായകൻ ഒരുക്കുന്ന അടുത്ത ചിത്രം എന്ന നിലയിലും രജനികാന്ത് ചിത്രമെന്ന നിലയിലും ഈ സിനിമയ്ക്കായി ഏറെ പ്രതീക്ഷയോടെ കാത്തിരിക്കുകയാണ് ആരാധകർ. ചിത്രത്തിൽ രജനികാന്ത് പൊലീസ് വേഷത്തിലാണ് എത്തുന്നത്. അമിതാഭ് ബച്ചൻ എത്തുന്നത് ചീഫ് പൊലീസ് ഓഫീസർ ആയാണ്. അനിരുദ്ധ് ആണ് ഈ ചിത്രത്തിന്റെ സംഗീത സംവിധായകൻ. 

മഞ്‍ജു വാര്യരും ഈ ചിത്രത്തിന്റെ ഭാ​ഗമാണ്. യഥാർഥ സംഭവത്തെ ആസ്പദമാക്കി ഒരുക്കുന്ന ചിത്രമാണ് വേട്ടൈയൻ എന്നാണ് സൂചന. ചിത്രത്തിൽ റിതിക സിംഗ്, ദുഷറ വിജയൻ, റാണ ദഗുബാട്ടി എന്നിവരും അഭിനയിക്കുന്നു. ചിത്രത്തിൻറെ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. ഒക്ടോബറിൽ ചിത്രം തിയേറ്ററുകളിൽ എത്തും. തമിഴിൽ മാരീചൻ, തെലുങ്കിൽ പുഷ്പ 2 എന്നിവയാണ് ഫഹദിന്റെ മറ്റ് പ്രോജക്ടുകൾ.