MC Chacko Passed Away: പ്രശസ്ത നാടക നടൻ എംസി ചാക്കോ അന്തരിച്ചു

ഇടുക്കി: പ്രശസ്ത നാടക നടൻ എം.സി ചാക്കോ അന്തരിച്ചു. 75 വയസായിരുന്നു. വാർധക്യ സഹജമായ അസുഖത്തെ തുടന്ന് ചികിത്സയിലിരിക്കെയായിരുന്നു അന്ത്യം സംഭവിച്ചത്. എം. സി കട്ടപ്പന എന്ന പേരിലാണ് ചാക്കോ അറിയപ്പെട്ടിരുന്നത്. 

1977-ൽ ആറ്റിങ്ങൽ ദേശാഭിമാനി തിയേറ്റേഴ്‌സിന്റെ പുണ്യതീർത്ഥംതേടി എന്ന പ്രൊഫഷണൽ നാടകത്തിലായിരുന്നു ആദ്യ അഭിനയം. മുപ്പതോളം പ്രൊഫഷണൽ നാടകങ്ങളിലായി ഏഴായിരത്തിലധികം വേദികളിൽ എം. സി കട്ടപ്പന അഭിനയിച്ചിട്ടുണ്ട്.  നിരവധി സിനിമകളിലും സീരിയലുകളിലും വേഷമിട്ടിട്ടുള്ള ചാക്കോയുടെ ശ്രദ്ധേയമായ ചിത്രങ്ങൾ കാഴ്ച, പളുങ്ക്, നായകൻ എന്നിവയാണ്.  

2007 ൽ കൊല്ലം അരീനയുടെ ആരും കൊതിക്കുന്നമണ്ണ് എന്ന നാടകത്തിലൂടെ മികച്ച നടനുള്ള സംസ്ഥാന സർക്കാർ അവാർഡ് ലഭിച്ചു. ശേഷം 2014 ൽ കേരള സംഗീത നാടക അക്കാദമിയുടെ അഭിനയശ്രീ പുരസ്‌കാരവും അദ്ദേഹത്തിന് ലഭിച്ചു. സംസ്കാരം ബുധനാഴ്ച്ച രാവിലെ 10 മണിക്ക് കട്ടപ്പന സെന്റ് ജോർജ് ഫോറോന പള്ളി സെമിത്തേരിയിൽ നടക്കുമെന്നാണ് റിപ്പോർട്ട്.