Joju George Review Controversy: `ദേഷ്യവും പ്രയാസവും കൊണ്ട് പ്രതികരിച്ചതാണ്, നിയമപരമായി മുന്നോട്ടുപോകും`; വിവാദത്തിൽ പ്രതികരിച്ച് ജോജു ജോർജ്

പണി സിനിമയെ വിമർശിച്ചുകൊണ്ടുള്ള റിവ്യൂ പങ്കുവച്ച റിവ്യൂവറെ ഭീഷണിപ്പെടുത്തിയ സംഭവത്തിൽ വിശദീകരണവുമായി നടനും സംവിധായകനുമായ ജോജു ജോർജ്. റിവ്യൂവറെ ഫോണിൽ വിളിച്ച് ഭീഷണിപ്പെടുത്തിയ സംഭവത്തിലാണ് ജോജു വിശദീകരണ വീഡിയോ പുറത്ത് വിട്ടത്. താൻ ഭീഷണിപ്പെടുത്തിയിട്ടില്ലെന്നും തന്റെ സിനിമയെ പറ്റി മോശം പറഞ്ഞപ്പോൾ ദേഷ്യവും പ്രയാസവും തോന്നിയെന്നും അതിന്റെ പേരിലാണ് റിയാക്ട് ചെയ്തതെന്നും ജോജു വീശദീകരിച്ചു.

എന്റെ സിനിമ ഇഷ്ടപ്പെട്ടില്ലെങ്കിൽ ഇഷ്ടപ്പെട്ടില്ലെന്ന് പറയണം. എന്റെ രണ്ട് വർഷത്തെ അധ്വാനമാണ് ഈ സിനിമ. ആ സിനിമയുടെ സ്പോയിലർ പറഞ്ഞ് പ്രചരിപ്പിക്കുന്നത് ശരിയല്ല. പല ​ഗ്രൂപ്പുകളിലും ഈ റിവ്യൂവർ ഇതേ പോസ്റ്റ് കോപ്പി പേസ്റ്റ് ചെയ്യുന്നു. സിനിമ കാണരുതെന്ന് പറയുന്നു. ഇത് ശരിയല്ലെന്നും വ്യക്തിപരമായി വൈരാ​ഗ്യം ഉണ്ടാകാൻ തനിക്ക് ഇയാളെ അറിയില്ലെന്നും ജോജു പറയുന്നു.

അഭിപ്രായ സ്വാതന്ത്ര്യത്തിന്റെ പേരിലല്ല ഞാൻ ഇയാളെ വിളിച്ചത്. മനപൂർവം ഇങ്ങനെ ചെയ്തതുകൊണ്ടാണ് അയാളെ വിളിച്ചത്. ഇക്കാര്യത്തിൽ നിയമപരമായി മുന്നോട്ട് പോകും. എന്റെ ജീവിതമാണ് സിനിമ. കോടികൾ മുടക്കിയാണ് ഈ സിനിമ നിർമിച്ചിരിക്കുന്നത്. സിനിമയിലെ കഥയുടെ സ്പോയിലർ പ്രചരിപ്പിക്കുകയാണ് ഇയാൾ ചെയ്തത്. ഞങ്ങളുടെ ജീവിതപ്രശ്നമാണിത്. അതുകൊണ്ടാണ് പ്രതികരിച്ചതെന്നും ജോജു വ്യക്തമാക്കി.

പണി സിനിമയെക്കുറിച്ചുള്ള നെ​ഗറ്റീവ് റിവ്യൂവിന്റെ  പേരിൽ ജോജു ജോർജ് ഫോണിൽ വിളിച്ച് ഭീഷണിപ്പെടുത്തുന്ന ഓഡിയോ റിവ്യൂവർ ആദർശ് സമൂഹമാധ്യമത്തിൽ പങ്കുവച്ചിരുന്നു. കോടികളുടെ മുതൽമുടക്കിൽ നിർമിച്ച ചിത്രത്തിനെതിരെ കുറിപ്പെഴുതിയ തന്നെ നേരിൽ കാണണമെന്നും മുന്നിൽ വന്ന് നിൽക്കാൻ ധൈര്യം ഉണ്ടോയെന്നും ജോജു ഫോണിലൂടെ ഭീഷണിപ്പെടുത്തുന്ന ഓഡിയോ ആണ് റിവ്യൂവർ പങ്കുവച്ചത്.