Aparna Vastarey Death: നടിയും അവതാരകയും ബിഗ് ബോസ് താരവുമായ അപർണ വസ്തരെ അന്തരിച്ചു

ബെംഗളൂരു: കന്നഡ നടിയും ബിഗ് ബോസ് താരവും അവതാരകയുമായ അപര്‍ണ വസ്‍തരെ അന്തരിച്ചു. 57 വയസായിരുന്നു. ശ്വാസകോശ അര്‍ബുദത്തെ തുടർന്ന് രണ്ടുവർഷമായി ചികിത്സയിലായിരുന്നു.

ഇന്നലെ വൈകുന്നേരത്തോടെയായിരുന്നു അന്ത്യം സംഭവിച്ചത്. അപര്‍ണ വസ്‍തരെ നിരവധി ടെലിവിഷൻ ഷോകളില്‍ അവതാരകയായിരുന്നു. 1990 കളില്‍ ഡിഡി ചന്ദനയിലെ മിക്ക ഷോകളുടെയും അവതാരകയായി താരം തിളങ്ങിയിരുന്നു. അപര്‍ണ വസ്‍തരെ 1984 ലായിരുന്നു സിനിമയില്‍ അരങ്ങേറ്റം കുറിച്ചത്. മസനഡ ഹൂവു എന്ന കന്നഡ സിനിമയിലൂടെയായിരുന്നു അരങ്ങേറ്റം.

സിനിമയ്ക്ക് പുറമേ നിരവധി സീരിയലുകളിലും അപര്‍ണ  വേഷമിട്ടിട്ടുണ്ട്. ഇതിൽ മൂഡല മനേ, മുക്ത തുടങ്ങിയ സീരിയലുകളാണ് പ്രധാനപ്പെട്ടവ. ബിഗ് ബോസ് കന്നഡ ഷോയുടെ ആദ്യ സീസണില്‍ പ്രധാന മത്സരാര്‍ഥിയായ ഒരു താരമായിരുന്നു അപര്‍ണ വസ്‍തരെ. 2013 ലായിരുന്നു മത്സരാര്‍ഥിയായെത്തിയത്.

അപര്‍ണ വസ്‍തരെ കോമഡി ടെലിവിഷൻ ഷോയിലും തന്റെ കഴിവ് പ്രകടിപ്പിച്ചിട്ടുണ്ട്. അപര്‍ണ വസ്‍തരെ മജാ ടോക്കീസ് ഷോയിലായിരുന്നു പങ്കെടുത്തത്. ഇവരുടെ ഭർത്താവ് നാഗരാജ് വസ്‍തരെയാണ്. അദ്ദേഹം കന്നഡ എഴുത്തുകാരനും ആര്‍കിടെക്റ്ററുമാണ്. അപർണയുടെ മരണത്തിൽ മുഖ്യമന്ത്രി സിദ്ധരാമയ്യ അടക്കം സിനിമ ടെലിവിഷൻ സാഹിത്യ രാഷ്രീയ രംഗത്തെ പ്രമുഖർ അനുശോചനം അറിയിച്ചിട്ടുണ്ട്.