Manassilayo: സൂപ്പർ സ്റ്റാറിനോടൊപ്പം ആടിതകർത്ത് മലയാളത്തിന്റെ ലേഡി സൂപ്പർ സ്റ്റാർ ; ട്രെന്റിം​ഗി‌ൽ ഒന്നാമതെത്തി `മനസ്സിലായോ`

സോഷ്യൽ മീഡിയ കീഴടക്കി വേട്ടയ്യനിലെ 'മനസ്സിലായോ' ഗാനം. സൂപ്പർ സ്റ്റാർ രജനീകാന്തിനൊപ്പം മലയാളത്തിന്റെ ലേഡി സൂപ്പർ സ്റ്റാർ മഞ്ചു വാര്യരും ആടി തകർത്ത  മനസ്സിലായോ  ​ഗാനം ഇതിനോടകം തന്നെ ട്രന്റിം​ഗ് ലിസ്റ്റിൽ ഒന്നാം സ്ഥാനം നേടി. അനിരുദ്ധ് രവിചന്ദർ സംഗീതം നിർവഹിച്ച ഗാനം പുറത്തിറങ്ങി ആദ്യ രണ്ടു മണിക്കൂറിനുള്ളിൽ 10 ലക്ഷത്തിലധികം പേരാണ്  കണ്ടത്.

സൂപ്പർ സ്റ്റാറിനൊപ്പം ചുവന്ന സാരി അണിഞ്ഞ് കൊണ്ടുള്ള മഞ്ചുവിന്റെ പവർ പാക്ക്ഡ് പെർഫോമൻസ് ആരാധകർ ഏറ്റെടുത്തു. അനിരുദ്ധ് രവിചന്ദർ, അന്തരിച്ച മലേഷ്യ വാസുദേവൻ, യുഗേന്ദ്രൻ വാസുദേവൻ, ദീപ്തി സുരേഷ് എന്നിവർ ചേർന്നാണ് ഗാനം ആലപിച്ചിരിക്കുന്നത്. സൂപ്പർ സുബുവും വിഷ്ണു എടവനും ചേർന്നാണ് വരികൾ എഴുതിയ ​ഗാനത്തിന്റെ ലിറിക്കൽ വിഡിയോയാണ് പുറത്തിറക്കിയത്.

എഐയുടെ സഹായത്തോടെയാണ് 13 വർഷങ്ങൾക്ക് മുമ്പ് അന്തരിച്ച മലേഷ്യ വാസുദേവന്റെ ശബ്ദം പുനസൃഷ്ടിച്ചത്. മലയാളവും തമിഴും കലർന്ന തരത്തിലാണ് ഗാനം ഒരുക്കിയിരിക്കുന്നത്.  അമിതാഭ് ബച്ചൻ, ഫഹദ് ഫാസിൽ, റാണ ദഗ്ഗുബതി  ദുഷാര വിജയൻ, റിതിക സിം​ഗ് തുടങ്ങി വൻ താരനിരയാണ് വേട്ടയ്യനിൽ അണിനിരക്കുന്നത്.

രജനീകാന്തിന്റെ 170-ാമത്തെ ചിത്രമായ വേട്ടയ്യൻ ഓക്ടോബർ 10ന് തിയറ്ററുകളിലെത്തും. ലൈക്ക പ്രൊഡക്ഷൻസിന്റെ ബാനറിൽ  സുബാസ്കരൻ നിർമ്മിക്കുന്ന സിനിമ തമിഴ്, തെലുങ്ക്, കന്നട, ഹിന്ദി തുടങ്ങിയ ഭാഷകളിലാണ് ഇറക്കുന്നത്.