Mohanlal: `മകനായി അഭിനയിക്കേണ്ടി വന്നിട്ടില്ല എനിക്ക് ഒരിക്കലും, ജീവിക്കുക തന്നെയായിരുന്നു`; ഹൃദയഭേദകമായ കുറിപ്പുമായി മോഹൻലാൽ

നടി കവിയൂർ പൊന്നമ്മയുടെ വിയോ​ഗത്തിൽ ഹൃദയഭേദകമായ കുറിപ്പ് പങ്കുവെച്ച് മോഹൻലാൽ. അമ്മയുടെ വിയോഗത്തിൻ്റെ വേദനയിൽ കുറിക്കുന്നതാണ് ഈ വാക്കുകൾ എന്ന് കുറിച്ചു കൊണ്ടാണ് മോഹൻലാലിന്റെ പോസ്റ്റ്. പെറ്റമ്മയോളം സ്നേഹം കഥാപാത്രത്തിനും തനിക്കും പകർന്നു തന്നയാളാണ് പൊന്നമ്മയെന്ന് മോഹൻലാൽ കുറിച്ചു. മലയാളി പ്രേക്ഷകർക്കും തങ്ങൾ അമ്മയും മകനുമായിരുന്നുവെന്നും മോഹൻലാൽ പറ‍ഞ്ഞു. കിരീടം, ഭരതം, വിയറ്റ്നാം കോളനി, ദശരഥം, നാട്ടുരാജാവ്, വടക്കും  നാഥൻ, കിഴക്കുണരും പക്ഷി, ഒപ്പം തുടങ്ങി നിരവധി ചിത്രങ്ങളിൽ ഇരുവരും അമ്മയും മകനുമായി അഭിനയിച്ചിട്ടുണ്ട്.

മോഹൻലാലിന്റെ പോസ്റ്റ്

''അമ്മയുടെ വിയോഗത്തിൻ്റെ വേദനയിൽ കുറിക്കുന്നതാണ് ഈ വാക്കുകൾ. പെറ്റമ്മയോളം സ്നേഹം കഥാപാത്രത്തിനും ഞാനെന്ന വ്യക്തിക്കും എക്കാലത്തും പകർന്നു തന്ന എൻ്റെ പ്രിയപ്പെട്ട പൊന്നമ്മച്ചേച്ചി. മലയാളത്തിലെ ഞങ്ങളുടെ പ്രിയപ്പെട്ട പ്രേക്ഷകർക്കും ഞങ്ങൾ അമ്മയും മകനും ആയിരുന്നു. എത്ര കാലം കഴിഞ്ഞാലും അമ്മയ്ക്ക് മകൻ മകൻ തന്നെയാണ് എന്ന സത്യം വിളിച്ചോതുന്നതായിരുന്നു, പല കാലഘട്ടങ്ങളിൽ ഞങ്ങൾ ഒരുമിച്ച ചിത്രങ്ങൾ. പൊന്നമ്മച്ചേച്ചിയോടൊപ്പം മകനായി അഭിനയിക്കേണ്ടി വന്നിട്ടില്ല എനിക്ക് ഒരിക്കലും, ജീവിക്കുക തന്നെയായിരുന്നു. കിരീടം, ഭരതം, വിയറ്റ്നാം കോളനി, ദശരഥം, നാട്ടുരാജാവ്, വടക്കും  നാഥൻ, കിഴക്കുണരും പക്ഷി, ഒപ്പം.. പൊന്നമ്മച്ചേച്ചി മാതൃത്വം പകർന്നുതന്ന എത്രയെത്ര സിനിമകൾ. മകൻ അല്ലായിരുന്നിട്ടും  മകനേ എന്ന് വിളിച്ച് ഓടിവരുന്ന ‘ഹിസ് ഹൈനസ് അബ്ദുള്ള’ യിലെ കഥാപാത്രം പോലെയായിരുന്നു ജീവിതത്തിൽ പൊന്നമ്മച്ചേച്ചി എനിക്കും..വിതുമ്പുന്ന വാക്കുകൾക്കൊണ്ട്, ചേച്ചിക്ക് ആദരാഞ്ജലികൾ അർപ്പിക്കാനാവുന്നില്ല.. ഓർമ്മകളിൽ എന്നും ആ മാതൃസ്നേഹം നിറഞ്ഞുതുളുമ്പും..''

ഇന്ന് വൈകിട്ടോടെയാണ് നടി കവിയൂർ പൊന്നമ്മ അന്തരിച്ചത്. 79 വയസായിരുന്നു. ശാരീരികാസ്വസ്ഥതകളെ തുടർന്ന് അതീവ ഗുരുതരാവസ്ഥയില്‍ ചികിത്സയിലിരിക്കെയാണ് അന്ത്യം. കുറച്ച് കാലമായി അഭിനയത്തില്‍ നിന്ന് ഇടവേളയെടുത്ത് വടക്കന്‍ പറവൂര്‍ കരിമാളൂരിലെ വസതിയില്‍ വിശ്രമ ജീവിതത്തിലായിരുന്നു കവിയൂർ പൊന്നമ്മ.