Nadanna Sambavam Movie : കേന്ദ്ര കഥാപാത്രങ്ങളായി ബിജു മേനോനും സുരാജും; നടന്ന സംഭവം ടീസർ

ബിജു മേനോനും സുരാജ് വെഞ്ഞാറമ്മൂടും കേന്ദ്ര കഥാപാത്രങ്ങളായി എത്തുന്ന പുതിയ ചിത്രമാണ് നടന്ന സംഭവം. ഛായാഗ്രാഹകനായ വിഷ്‍ണു നാരായണ്‍ സംവിധാനം ചെയ്യുന്ന ചിത്രത്തിന്റെ ടീസർ പുറത്ത് വിട്ടു. കോമഡി പശ്ചാത്തലത്തിൽ ഒരുക്കുന്ന ഫാമിലി എന്റർടെയ്നർ ചിത്രമാകും നടന്ന സംഭവം എന്ന സൂചനയാണ് ടീസറിൽ നിന്നും ലഭിക്കുന്നത്. ചിത്രം മാർച്ച് 22ന് തിയറ്ററുകളിൽ എത്തും.

അനൂപ് കണ്ണൻ സ്റ്റോറീസിന്റെ ബാനറിൽ അനൂപ് കണ്ണൻ, രേണു എ എന്നിവർ ചേർന്നാണ് ചിത്രം നിർമ്മിക്കുന്നത്. ബിജു മേനോനും സുരാജിനും പുറമെ ശ്രുതി രാമചന്ദ്രൻ, ജോണി ആന്റണി, ലിജോമോൾ ജോസ്, സുധി കോപ്പ, ലാലു അലെക്സ്, നൌഷാദ് അലി, അതിര ഹരികുമാർ, അനഘ അശോക്, ശ്രീജിത്ത് നായർ, എയ്തൾ ഇവന ഷെറിൻ, ജെസ് സ്വീജ എന്നിവരും ചിത്രത്തിൽ പ്രധാന വേഷങ്ങളിൽ എത്തുന്നുണ്ട്. 

ദുൽഖർ സൽമാന്റെ കലി, ജിന്ന് എന്നീ സിനിമകളുടെ രചയിതാവായ രാജേഷ് ഗോപിനാഥനാണ് ചിത്രത്തിന്റെ തിരക്കഥ. മിനേഷ് മാധവനാണ് ചിത്രത്തിന്റെ ഛായാഗ്രാഹണം നിർവഹിക്കുന്നത്. അങ്കിത് മേനോനാണ് സംഗീത സംവിധാനം.