NP 42 Movie: `എൻപി 42`ൽ നായികമാർ ഇവർ... ആരാധകരെ ആവേശത്തിലാക്കി നിവിൻ - ഹനീഫ് ചിത്രത്തിന്റെ അപ്ഡേറ്റ്
പോളി ജൂനിയർ പിക്ചേഴ്സും മാജിക് ഫ്രെയിംസും ചേർന്നാണ് നിവിൻ പോളിയുടെ എൻപി 42 എന്ന ചിത്രം നിർമ്മിക്കുന്നത്.
മിഖായേലിന് ശേഷം നിവിൻ പോളിയെ നായകനാക്കി ഹനീഫ് അദേനി സംവിധാനം ചെയ്യുന്ന ചിത്രത്തിന്റെ പുതിയ അപ്ഡേറ്റെത്തി. എൻപി 42 എന്ന് താൽക്കാലികമായി പേരിട്ടിരിക്കുന്ന ചിത്രത്തിൽ മുകുന്ദൻ ഉണ്ണി അസോസിയേറ്റ്സിലൂടെ ശ്രദ്ധേയ ആയ ആർഷ ബൈജു, മമിത ബൈജു എന്നിവരാണ് നായികമാർ. സിനിമയുടെ ചിത്രീകരണം യുഎഇയിൽ തുടങ്ങിയതായാണ് റിപ്പോർട്ട്. ചിത്രത്തിന്റെ പേര് വൈകാതെ തന്നെ അനൗൺസ് ചെയ്യുമെന്നാണ് പ്രതീക്ഷ. നിവിന്റെ 42ാമത്തെ ചിത്രമാണിത്.
വിനയ് ഫോർട്ട്, വിജിലേഷ്, ജാഫർ ഇടുക്കി എന്നിവരും ചിത്രത്തിൽ കേന്ദ്ര കഥാപാത്രങ്ങളെ അവതരിപ്പിക്കുന്നുണ്ട്. നിവിൻ പോളിയുടെ പോളി ജൂനിയർ പിക്ചേഴ്സും ലിസ്റ്റിൻ സ്റ്റീഫന്റെ മാജിക് ഫ്രെയിംസും ചേർന്നാണ് ചിത്രം നിർമ്മിക്കുന്നത്. വിഷ്ണു തണ്ടാശേരിയാണ് ഛായാഗ്രാഹകൻ. എഡിറ്റർ നിഷാദ് യൂസഫ് ആണ്. ചിത്രത്തിന്റെ കൂടുതൽ രംഗങ്ങളും യുഎഇയിലാണ് ചിത്രീകരിക്കുന്നത്.
അടുത്തിടെ നിവിൻ പോളിയുടെ പുതിയ ലുക്കിലെ ചിത്രങ്ങൾ സമൂഹ മാധ്യമങ്ങളിൽ വൈറലായിരുന്നു. സിനിമയ്ക്ക് വേണ്ടി വണ്ണം കുറച്ച ശേഷമുള്ള നിവിന്റെ ചിത്രമാണ് വൈറലായത്. ചിത്രങ്ങൾ ആരാധകർ ഏറ്റെടുത്തിരുന്നു. വണ്ണത്തിന്റെ പേരിൽ നിരവധി നെഗറ്റീവ് കമന്റുകൾ നിവിന് നേരെയുണ്ടായിരുന്നു. അതിനിടെയാണ് പുത്തൻ മേക്കോവറിലെത്തി താരം ഏവരെയും ഞെട്ടിച്ചത്.
തമിഴിലും നിവിൻ നായകനാകുന്ന ചിത്രം ഒരുങ്ങുന്നുണ്ട്. റാം ഒരുക്കുന്ന ഏഴ് കടൽ ഏഴ് മലൈ എന്ന ചിത്രത്തിലാണ് നിവിൻ അഭിനയിക്കുന്നത്. കൂടാതെ ലോകേഷ് കനകരാജിന്റെ ദളപതി 67ലും നിവിൻ അഭിനയിക്കുന്നുണ്ട് എന്ന തരത്തിൽ വാർത്ത പ്രചരിക്കുന്നുണ്ട്. എന്നാൽ ഇതിൽ ഔദ്യോഗിക സ്ഥിരീകരണം ഉണ്ടായിട്ടില്ല.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...